நாமக்கல் மாவட்டம் ராசிபுரம் அருகே குட்டையில் மூழ்கி உயிரிழந்த மகனுக்கு செவிலியர் ஆன தாய் முதல் உதவி செய்து காப்பாற்ற முயன்ற சம்பவம் காண்போரை கண்கலங்க வைத்தது.
மெக்கானிக் கடை நடத்திவரும் மணிவண்ணன் என்பவர் மனைவி ரோஸி மற்றும் இரண்டு மகன்களுடன் காக்காவேரி பகுதியில் வசித்து வருகிறார். ரோஸி தனியார் மருத்துவமனையில் செவிலியராக பணியாற்றி வருகிறார். இவர்களின் மூத்த மகனான ஷ்யாம் எட்வின் நண்பர்களுடன் அப்பகுதியில் உள்ள குட்டை ஒன்றில் குளிக்கச் சென்றரர். அப்போது எதிர்பாராதவிதமாக நீரில் மூழ்கி பரிதாபமாக உயிரிழந்தார். அதை பார்த்த அக்கம்பக்கத்தினர் ஷ்யாம் எட்வினின் உடலை மீட்டனர்.
அப்போது அங்கு வந்த தாய் ரோஸி தன்னுடைய மகன் இறக்கவில்லை என்று கூறி முதல் உதவி செய்தார். மகன் உயிரிழந்ததை ஏற்க மறுத்த ரோஸியின் இந்த செயலைக் கண்ட அப்பகுதி மக்கள் கண் கலங்கி நின்றனர். பின்னர் அரசு மருத்துவமனைக்கு ஷ்யாம் எட்வினின் உடல் கொண்டு செல்லப்பட்டு உடற்கூறு ஆய்வு செய்யப்பட்டது.