ஜம்மு காஷ்மீரில் பாதுகாப்பு படையினர் நடத்திய துப்பாக்கி சூட்டில் 2 பயங்கரவாதிகள் சுட்டுக் கொல்லப்பட்டனர்.
ஜம்மு காஷ்மீரில் குட்புறா பகுதியில் பயங்கரவாதிகள் பதுங்கியிருப்பதாக பாதுகாப்பு படையினருக்கு ரகசிய தகவல் கிடைத்துள்ளது. அதனால் அப்பகுதியை சுற்றி வளைத்து பாதுகாப்பு படையினர் தீவிர தேடுதல் வேட்டையில் ஈடுபட்டனர். அப்போது அங்கு பதுங்கியிருந்த பயங்கரவாதிகள் பாதுகாப்பு படையினரை நோக்கி துப்பாக்கி சூடு தாக்குதல் நடத்தினர்.
அதற்கு உடனடியாக பாதுகாப்பு படையினர் தக்க பதிலடி கொடுத்தனர். அதனால் நீண்ட நேரமாக இரு தரப்பினருக்கும் இடையே கடுமையான துப்பாக்கி சண்டை நடந்தது. அந்த சண்டையில் இரண்டு பயங்கரவாதிகள் சுட்டுக் கொல்லப்பட்டனர். அதன் பிறகு அவர்களிடம் இருந்து துப்பாக்கிகள் மற்றும் கையெறி குண்டுகள் உள்ளிட்ட பயங்கர ஆயுதங்கள் அனைத்தும் கைப்பற்றப்பட்டன.