தமிழக அரசின் உத்தரவை மீறி பேரறிவாளனுக்கு மேலும் ஒரு வாரம் பரோல் வழங்கி உச்சநீதிமன்றம் உத்தரவிட்டுள்ளது.
பேரறிவாளனின் பரோல் காலம் வரும் 30ஆம் தேதி முடிவடைய உள்ள நிலையில் தனக்கு வழங்கப்பட்ட பரோலை மேலும் 90 நாட்கள் நீட்டிக்கக்கோரி உச்சநீதிமன்றத்தில் பேரறிவாளன் கூடுதல் மனு ஒன்றை தாக்கல் செய்தார். விசாரணையின் போது சிறுநீரக சிகிச்சைக்கு செல்ல வேண்டியிருப்பதால் தனது பரோலை நீட்டிக்க வேண்டும் என பேரறிவாளன் தரப்பில் கூறப்பட்டது. மேலும் சிகிச்சைக்கு செல்லும் போது பாதுகாப்பு அளிக்க வேண்டும் என்றும் வலியுறுத்தப்பட்டது.
ஆனால் பரோலை மேலும் நீட்டிக்க தமிழக அரசு எதிர்ப்பு தெரிவித்தது. மனுவை விசாரித்த உச்சநீதிமன்றம் தமிழக அரசின் எதிர்ப்பை மீறி பரோலை மேலும் ஒரு வாரம் நீட்டித்து உத்தரவிட்டுள்ளது. மேலும் சிகிச்சைக்காக மருத்துவமனைக்குச் செல்லும்போது பேரறிவாளனுக்கு உரிய பாதுகாப்பு வழங்க வேண்டும் என்றும் உச்சநீதிமன்றம் உத்தரவிட்டுள்ளது.