விவசாயிகள் நடத்தி வரும் போராட்டத்தில் இளம் விவசாயி ஒருவர் உயிரிழந்துள்ளது சோகத்தை ஏற்படுத்தியுள்ளது.
மத்திய அரசு கொண்டு வந்த வேளாண் சட்டங்களை எதிர்த்து விவசாயிகள் டெல்லியில் தொடர் போராட்டத்தில் ஈடுபட்டு வருகின்றனர். போராட்டத்தில் ஈடுபட்ட விவசாயிகளுடன் மத்திய அரசு பேச்சு வார்த்தையில் ஈடுபட்டபோதும், அது எடுபடாத நிலையில், கடுங்குளிரில் விவசாயிகள் தங்களுடைய போராட்டத்தை நடத்தி வருகின்றனர். இந்நிலையில் இன்று நாடு முழுவதும் முழுஅடைப்பு போராட்டம் நடைபெற்றது. இதனால் புதுச்சேரியில் பேருந்துகள் மற்றும் ஆட்டோக்கள் ஓடவில்லை. தமிழகத்தில் வழக்கம்போல பேருந்துகள் இயங்கியது.
இதில் விவசாய சட்டங்களை எதிர்த்து போராட்டத்தில் தீவிரமாக ஈடுபட்ட ஹரியானாவை சேர்ந்த இளம் விவசாயி அஜய் மூர்(32) என்பவர் அகால மரணம் அடைந்தது சோகத்தை ஏற்படுத்தியுள்ளது. டெல்லி – ஹரியானா எல்லை திக்ரியில் போராட்டத்தில் தீவிரமாக ஈடுபட்டிருந்த அஜய் திடீர் மரணமடைந்தார். கடும் குளிர் காரணமாக அவர் உயிரிழந்ததாக தெரியவந்துள்ளது. மேலும் பஞ்சாபை சேர்ந்த விவசாயி மேவா சிங்(48) என்பவரும் உயிரிழந்துள்ளார்.