டெல்லியில் நடைபெற்று வரும் விவசாயிகள் போராட்டத்தை ஆதரித்து இன்று முதல் ரயில் மறியல் உள்ளிட்ட போராட்டம் நடத்தப் போவதாக தமிழக காவிரி விவசாயிகள் சங்கம் அறிவித்துள்ளது.
மத்திய அரசு நிறைவேற்றியுள்ள வேளாண் சட்டங்களுக்கு எதிர்ப்பு தெரிவித்து டெல்லியில் விவசாயிகள் தொடர் போராட்டம் நடத்தி வருகின்றன. பல்வேறு மாநிலங்களில் உள்ள லட்சக்கணக்கான விவசாயிகள் அங்கு ஒன்று திரண்டு இரவு பகல் பாராமல் போராடி வருகிறார்கள். அவர்களின் போராட்டத்தை கலைக்க போலீசார் பல்வேறு முயற்சிகளை மேற்கொண்ட போதிலும் எந்த ஒரு பலனும் இல்லை.
அதுமட்டுமன்றி மத்திய அரசு விவசாயிகளுடன் பல்வேறு கட்ட பேச்சுவார்த்தை நடத்தியது. இருந்தாலும் எந்த ஒரு முடிவும் எட்டப்படவில்லை. வேளாண் சட்டத்தை முழுவதுமாக திரும்ப பெறும் வரையில் எங்கள் போராட்டம் தொடரும் என விவசாயிகள் தெரிவித்துள்ளனர். இந்நிலையில் நாட்டின் பல்வேறு இடங்களில் இருந்து 1200 டிராக்டர்களில் 50 ஆயிரத்திற்கும் மேற்பட்ட விவசாயிகள் டெல்லியை நோக்கி வருவதாக தகவல் வெளியாகியுள்ளது.
இந்நிலையில் விவசாயிகளுக்கு ஆதரவு தெரிவித்து இன்று முதல் ரயில் மறியல் உள்ளிட்ட பல கட்ட போராட்டம் நடத்தப் போவதாக தமிழக காவிரி விவசாயிகள் சங்கத்தின் தலைவர் பாண்டியன் அறிவித்துள்ளார். அதுமட்டுமன்றி டிசம்பர் 18 ஆம் தேதி ஆளுநர் மாளிகையை முற்றுகையிட்டு போராட்டம் நடத்தப் போவதாகவும் கூறியுள்ளார்.