புதுச்சேரியில் கனமழை காரணமாக இன்று மட்டும் பள்ளிகளுக்கு ஒரு நாள் விடுமுறை அளித்து பள்ளிக்கல்வி இயக்குனர் அறிவித்துள்ளார்.
தமிழகத்தில் கடந்த மாதம் உருவான இரண்டு புயல்கள் பல்வேறு மாவட்டங்களில் கன மழை கொட்டி தீர்த்தது. அதன்பிறகு வறண்ட வானிலை நிலவி வந்த நிலையில், கடந்த ஒரு வாரமாக தமிழகத்தில் பல மாவட்டங்களில் பரவலாக மழை பெய்து வருகிறது. இந்நிலையில் ஜனவரி 11ஆம் தேதி கனமழை தொடரும் என வானிலை ஆய்வு மையம் தெரிவித்துள்ளது. இதனையடுத்து வளிமண்டலத்தில் நிலவும் மேலடுக்கு சுழற்சி காரணமாக புதுச்சேரியில் 3 நாட்களுக்கு இடி மின்னலுடன் கூடிய மழை பெய்யும் என சென்னை வானிலை ஆய்வு மையம் அறிவித்துள்ளது.
புதுச்சேரியில் கடந்த 4ஆம் தேதி முதல் 1 முதல் 12-ஆம் வகுப்பு மாணவர்களுக்கு சுழற்சி முறையில் பள்ளிகள் திறக்கப்பட்டுள்ளன. இந்நிலையில் புதுச்சேரி பள்ளிக்கல்வித்துறை இயக்குனர் கனமழை காரணமாக இன்று மட்டும் பள்ளிகளுக்கு ஒரு நாள் விடுமுறை அளித்து அறிவித்துள்ளார்.