தமிழக சட்டமன்ற தேர்தலில் பாஜகவுக்கு ஆதரவளிக்க ரஜினியிடம் கேட்க உள்ளதாக எச்.ராஜா தெரிவித்துள்ளார்.
தமிழகத்தில் கடந்த 20 ஆண்டுகளுக்கு மேலாக இதோ வருகிறேன், இதோ வருகிறேன் என்று பூச்சாண்டி காட்டிய ரஜினி, தனது அரசியல் பிரவேசம் குறித்து கடந்த டிசம்பர் 3 ஆம் தேதி அதிகாரப்பூர்வமாக அறிவித்தார். தமிழகத்தின் தலையெழுத்தை மாற்ற இதோ எனது தலைவன் வந்துவிட்டான் என்று ரசிகர்கள் ஆரவாரம் செய்ய தமிழக அரசியல்வாதிகள் கொஞ்சம் பீதியடைந்தனர். இந்நிலையில் கட்சி தொடங்கிய அரசியலுக்கு வர முடியவில்லை என்பதை மிகுந்த வருத்தத்துடன் தெரிவித்துக் கொள்கிறேன் என்று நடிகர் ரஜினி பரபரப்பு அறிவிப்பை வெளியிட்டுள்ளார்.
என்னை நம்பி என்னுடன் வருபவர்களை நான் பலிகடா ஆக்க விரும்பவில்லை. முடிவு பற்றி அறிவிக்கும் போது எனக்கு ஏற்பட்ட வலி எனக்கு மட்டுமே தெரியும். தேர்தல் அரசியலுக்கு வராமல் மக்களுக்கு என்னால் என்ன செய்ய முடியுமோ அதை நான் செய்வேன் என்று அவர் தெரிவித்துள்ளார். இந்த அறிவிப்பு அவரின் ரசிகர்களிடையே ஏமாற்றத்தை ஏற்படுத்தியுள்ளது.
இந்நிலையில் தமிழக சட்டமன்ற தேர்தலில் பாஜகவுக்கு ஆதரவு அளிக்க வேண்டும் என்று ரஜினியிடம் கேட்க உள்ளதாக எச்.ராஜா தெரிவித்துள்ளார். மக்கள் நீதி மய்யம் கட்சியிலிருந்து விலகி இன்னும் பல பாஜகவில் இணைய உள்ளனர் என்றும் தகவல் தெரிவித்துள்ளார். அரசியலுக்கு வரவில்லை என ரஜினி திட்டவட்டமாக அறிவித்து விட்ட நிலையில், அவரை பாஜக விடுவதாக தெரியவில்லை என்று அரசியல் விமர்சகர்கள் கருத்து தெரிவித்துள்ளனர்.