டெல்லியில் ஜனவரி 26ம் தேதி குடியரசு தினத்தன்று நடக்க உள்ள டிராக்டர் பேரணிக்கு இன்று விவசாயிகள் ஒத்திகை பார்த்தனர்.
மத்திய அரசின் 3 வேளாண் சட்டங்களுக்கு எதிர்ப்பு டெல்லியில் விவசாயிகள் 43 வது நாளாக தொடர் போராட்டம் நடத்தி வருகிறார்கள். கொட்டும் பனியிலும் கடும் குளிரையும் பொருட்படுத்தாமல் தொடர்ந்து தங்கள் கோரிக்கையை முன்வைத்து போராட்டத்தில் ஈடுபட்டுள்ளனர். மத்திய அரசு பல்வேறு கட்ட பேச்சுவார்த்தை நடத்திய போதிலும் எந்த ஒரு முடிவும் எட்டப்படவில்லை. வேளாண் திட்டத்தை முழுவதுமாக திரும்ப பெறும் வரையில் எங்கள் போராட்டம் தொடரும் என விவசாயிகள் அனைவரும் தெரிவித்துள்ளனர். இந்நிலையில் ஜனவரி 26-ஆம் தேதி குடியரசு தினத்தன்று டெல்லி முழுவதும் டிராக்டர் பேரணி நடத்தப்படும் என்று விவசாயிகள் தெரிவித்துள்ளனர்.
இதனையடுத்து குடியரசு தினத்தன்று நடக்கவுள்ள பேரணிக்கு இன்று ஒத்திகை பார்த்தனர். கடுங்குளிரிலும் தொடர்ந்து போராட்டம் நடைபெற்று வரும் நிலையில், இதுவரை 50க்கும் மேற்பட்டோர் உயிரிழந்துள்ளது குறிப்பிடத்தக்கது. நாடு முழுவதும் உள்ள பல்வேறு தரப்பினர் விவசாயிகளுக்கு தொடர் ஆதரவு தெரிவித்து வருகிறார்கள்.