துபாயில் இருந்து சென்னைக்கு கடத்திவரப்பட்ட தங்கத்தை சுங்கத்துறை அதிகாரிகள் பறிமுதல் செய்து கடத்தல் செயலில் ஈடுபட்ட 12 பேரை கைது செய்தனர்.
தங்கத்தின் விலை நாளுக்கு நாள் அதிகமாகிக்கொண்டே இருக்கிறது. இருப்பினும் மக்கள் அதனை வாங்குவதற்கு மிகவும் ஆர்வம் காட்டி வருகின்றனர். சிலர் திருட்டு வேலைகளிலும்,கடத்தல் வேலைகளிலும் ஈடுபடுகின்றனர். இதேபோல் நேற்று துபாயிலிருந்து, சென்னைக்கு ஒரு சிறப்பு விமானம் வந்தது. அதில் வந்த பயணிகள் அனைவரையும் சுங்கத்துறை அதிகாரிகள் சோதனையிட்டனர்.
அதில் சந்தேகத்திற்கு இடமான 12 பயணிகளை போலீசார் தீவிர சோதனை செய்தனர். சோதனையில், அவர்கள் கொண்டு வந்த சாக்லேட் பாக்கெட், உள்ளாடைகள், முகக் கவசம், காலணிகள் போன்றவற்றில் தங்க பேஸ்ட், தங்க கட்டிகள், தங்கத் துண்டுகள், தங்க நகைகளை மறைத்து வைத்து கடத்தி வந்துள்ளனர்.
இதனை கண்டறிந்த சுங்கத்துறை அலுவலர்கள் சென்னையை சேர்ந்த பத்மபாலாஜி என்ற இளம் பெண் உட்பட கடத்தல் வேலையில் ஈடுபட்ட 12 பயணிகளை கைது செய்து அவர்களிடம் இருந்து 3 கிலோ 750 கிராம் தங்கத்தை பறிமுதல் செய்தனர். சர்வதேச மதிப்பின்படி அவர்கள் கடத்திவரப்பட்ட தங்கத்தின் மதிப்பு 2 கோடி என்று தெரியவந்தது. மேலும் கைது செய்யப்பட்ட 12 நபர்களிடம் சுங்கத் துறை அலுவலர்கள் தீவிர விசாரணை செய்து வருகின்றனர்.