சேலத்தில் பொங்கல் பானை விற்கும் பணி தீவிரமாக நடை பெற்று வருகிறது.
தமிழர் திருநாளாம் உழவர் திருநாள் வரும் 14-ஆம் தேதி தமிழ்நாட்டில் மிகவும் சிறப்பாக கொண்டாடப்பட உள்ளது. இந்த விழாவை முன்னிட்டு சேலம் குமாரசாமிப்பட்டி, கிச்சிப்பாளையம், சூரமங்கலம், அம்மாபேட்டை உள்ளிட்ட பல்வேறு பகுதிகளில் பொங்கல் பானை விற்பனை மும்மரமாக நடைபெற்று வருகிறது. பல வண்ணங்களில் அலங்கரிக்கப்பட்ட பல்வேறு விதமான பானைகள் வாடிக்கையாளர்களுக்கு விற்பனை செய்யப்பட்டு வருகிறது. விற்பனைக்கு வைக்கப்பட்டுள்ள பானைகளின் விலை 10 விழுக்காடு முதல் 20 விழுக்காடு வரை அதிகரித்துள்ளதாக வியாபாரிகள் தெரிவித்துள்ளனர்.
மேலும் தொடர் மழையால் புதியதாக பானைகள் சூளையில் வைத்து சுட்டு எடுக்க முடியாத நிலை ஏற்பட்டுள்ளதால் பானைகளின் விலை சற்று அதிகரித்துள்ளது என்று வியாபாரிகள் கூறுகின்றனர். கொரோனா பரவல் தற்போது குறைந்துவிட்டதால் பொதுமக்கள் ஆர்வத்துடன் வந்து பொங்கல் பானைகள் , சீர் பொங்கல் பானைகளை வாங்கி செல்கிறார்கள். இதனால் மண்பாண்ட தொழிலாளர்கள் மற்றும் பானை விற்பனையாளர்கள் மிகவும் மகிழ்ச்சி அடைந்துள்ளனர்.