இளம் பெண் ஒருவர் பாலியல் கொடுமை வழக்கில் சம்பந்தப்பட்ட நபர்கள் குறித்து ரகசிய வாக்குமூலம் கொடுத்துள்ள சம்பவம் பரபரப்பை ஏற்படுத்தியுள்ளது.
கோயம்புத்தூர் மாவட்டத்திலுள்ள பொள்ளாச்சியில் இளம்பெண்கள் மற்றும் கல்லூரி மாணவிகளை பலாத்காரம் செய்த குற்றத்திற்காக சதீஷ், வசந்தகுமார், திருநாவுக்கரசு, சபரிராஜன் மற்றும் மணிவண்ணன் போன்ற 5 பேரை போலீசார் கைது செய்தனர். மேலும் இந்த பாலியல் வழக்கு குறித்து சி.பி.ஐ விசாரணை நடத்தி வருகின்றது. இந்நிலையில் சி.பி.ஐ போலீசார் கடந்த 5 ஆம் தேதி தங்களுக்கு கிடைத்த ஆதாரங்களின் அடிப்படையில் அ.தி.மு.க முன்னாள் மாணவர் அணி செயலாளர் அருளானந்தம், ஹெரோன் பால் மற்றும் பைக் பாபு போன்ற 3 பேரை கைது செய்து விட்டனர்.
மேலும் பாதிக்கப்பட்ட மூன்று பெண்கள் அளித்த வாக்குமூலத்தின் அடிப்படையில் தான் இவர்கள் மூன்று பேரையும் கைது செய்ததாக சி.பி.ஐ போலீசார் தெரிவித்துள்ளனர். இதனையடுத்து கடந்த 25 ஆம் தேதி மேலும் ஒரு இளம்பெண் கோவை மகளிர் கூடுதல் கோர்ட்டில் பெண் நீதிபதி திலகேஸ்வரி முன்பு ரகசிய வாக்குமூலம் அளித்திருக்கிறார். அந்த வாக்குமூலத்தில் தன்னை பாலியல் பலாத்காரம் செய்ததாகவும், அதில் சம்பந்தப்பட்ட சில நபர்களின் பெயர்களையும் அவர் நீதிபதியிடம் கூறியுள்ளார். இந்த சம்பவம் குறித்து விசாரணை நடைபெற்றுக் கொண்டிருக்கிறது. எனவே இந்த பாலியல் வழக்கில் மேலும் பலர் கைது செய்யப்படுவார்கள் என சி.பி.ஐ தரப்பில் தெரிவிக்கப்பட்டுள்ளது. பாலியல் வழக்கில் இளம்பெண் கோர்ட்டில் ரகசிய வாக்குமூலம் கொடுத்துள்ள சம்பவம் பரபரப்பை ஏற்படுத்தியது.