யானை மிதித்ததால் வாலிபர் உடல் நசுங்கி உயிரிழந்த சம்பவம் சோகத்தை ஏற்படுத்தியுள்ளது.
கோயம்புத்தூர் மாவட்டத்தில் உள்ள எல்.ஐ.சி காலனியில் கார்த்திக் என்பவர் வசித்து வந்துள்ளார். இவர் நரசிபுரம் பகுதியில் உள்ள ஒரு கோவிலுக்கு அடிக்கடி சென்று வருவது வழக்கம். இவர் வழக்கம்போல் கோவிலுக்கு சென்று விட்டு பச்சாவயல்பதி என்ற இடத்திலிருந்து தனது வீட்டிற்கு புறப்பட்டுள்ளார். அப்போது மேற்கு தொடர்ச்சி மலையின் அடிவாரப் பகுதியான ஆத்தூர் என்ற கிராமத்தில் உள்ள பத்திரகாளியம்மன் கோவில் அருகே அமைந்துள்ள ஒரு பாலத்தை கடக்க முயன்ற போது, திடீரென வந்த ஒரு யானை கார்த்திக்கை விரட்ட தொடங்கிவிட்டது. இதனை பார்த்து அதிர்ச்சி அடைந்த கார்த்திக் அங்கிருந்து ஓடியுள்ளார்.
ஆனால் அந்த யானை அவரை விடாமல் விரட்டி சென்று கார்த்திகை துதிக்கையால் தூக்கி தரையில் ஓங்கி அடித்து விட்டது. இதனையடுத்து ரத்த வெள்ளத்தில் உயிருக்கு போராடிய கார்த்திகை யானை மிதித்ததால் அவரது குடலானது வெளியே வந்து கார்த்திக் பரிதாபமாக உயிரிழந்து விட்டார். இந்நிலையில் கார்த்திக் உயிரிழந்ததை கண்ட தோட்ட வேலைக்கு சென்றவர்கள் வனத்துறை மற்றும் போலீசாருக்கு தகவல் அளித்தனர். அதன் பின் சம்பவ இடத்திற்கு விரைந்து வந்த வனத்துறையினர் அந்த வாலிபரின் உடலை மீட்டு கோவை அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இச்சம்பவம் குறித்து வடவள்ளி போலீசார் விசாரணை நடத்தி வருகின்றனர்.