பிரிட்டனில் கண்டறியப்பட்ட உருமாறிய கொரோனா வைரஸ் 82 நாடுகளுக்கு பரவி உள்ளதாக உலக சுகாதார அமைப்பு எச்சரிக்கை விடுத்துள்ளது.
பிரிட்டனில் கடந்த டிசம்பரில் புதிய வகை உருமாறிய கொரோனா வைரஸ் கண்டறியப்பட்டது. இந்த புதிய வைரஸ் தங்கள் நாடு முழுவதும் பரவாமல் இருக்க இந்தியா உட்பட பல சர்வதேச நாடுகள் பிரிட்டன் உடனான விமான போக்குவரத்து சேவைக்கு தற்காலிக தடை விதித்தனர். ஆனால் தடை விதிப்பதற்கு முன்பே புதிய கொரோனா வைரஸ் பல்வேறு நாடுகளுக்கு பரவியது.
இந்நிலையில் பிரிட்டனில் கண்டறியப்பட்ட உருமாறிய கொரோனா வைரஸ் 82 நாடுகளுக்கும், தென் ஆப்பிரிக்காவில் கண்டறியப்பட்ட மற்றொரு உருமாறிய கொரோனா வைரஸ் 39 நாடுகளுக்கும், பிரேசில் கண்டறியப்பட்ட மேலும் ஒரு உருமாறிய கொரோனா வைரஸ் 9 நாடுகளுக்கும் பரவி உள்ளதாக உலக சுகாதார நிறுவனம் தெரிவித்துள்ளது. உருமாறிய புதிய வகை கொரோனா வைரஸ்கள் மிகவும் எளிதில் பரவும் தன்மை கொண்டதால் அனைத்து நாடுகளும் மிகுந்த கவனத்துடன் இருக்க வேண்டும் என்று உலக சுகாதார அமைப்பு எச்சரிக்கை விடுத்துள்ளது.