மினி வேனில் கடத்தி வரப்பட்ட 6 லட்சம் மதிப்புள்ள குட்கா மற்றும் தடை செய்யப்பட்ட புகையிலை பொருட்களை காவல்துறையினர் பறிமுதல் செய்தனர்.
வேலூர் மாவட்டத்தில் உள்ள பள்ளிகொண்டா சப் இன்ஸ்பெக்டர் கண்ணன் மற்றும் காவல்துறையினர் நேற்று முன்தினம் இரவு பள்ளிகொண்ட சுங்கச்சாவடியில் வாகன சோதனையில் ஈடுபட்டுள்ளனர். அந்த சமயத்தில் பெங்களூரிலிருந்து வேலூரை நோக்கி வந்த ஒரு மினி வேன் சுங்கச்சாவடியில் நின்றுள்ளது. அந்த வேன் டிரைவர் சந்தேகத்திற்கு இடமளிக்கும் வகையில் நடந்து கொண்டதால் காவல்துறையினர் அவரை அழைத்து விசாரித்துள்ளனர்.
அவர் சரியாக பதில் அளிக்காத காரணத்தினால் வேனை சோதனை செய்துள்ளனர். இந்த சோதனையில் சுமார் 1 டன் குட்கா மற்றும் புகையிலை பொருட்கள் இருந்தது தெரியவந்துள்ளது. இதனை அடுத்து காவல்துறையினர் சுமார் 6 லட்சம் மதிப்புள்ள குட்கா மற்றும் புகையிலை பொருட்கள் மற்றும் கடத்தலுக்கு பயன்படுத்தப்பட்ட வேனையும் பறிமுதல் செய்து வேன் டிரைவரையும் கைது செய்துள்ளனர்.