அதிவேகமாகவும் அதிக பாரம் ஏற்றியும் செல்லும் டிப்பர் லாரிகளை பொதுமக்கள் சிறைப்பிடித்து போராட்டத்தில் ஈடுபட்டுள்ளனர்.
பெரம்பலூர் மாவட்டத்திலுள்ள நெடுவாசல், கவுள்பாளையம், இறையூர், கல்பாடி ஆகிய கிராமங்களில் அதிகளவு கல்குவாரிகள் மற்றும் கிரஷர்களில் இருந்து டிப்பர் லாரி அதிக வேகமாகவும் அதிக பாரம் ஏற்றி கொண்டும் வருவதால் அப்பகுதியில் அடிக்கடி விபத்து நிகழ்கின்றன. இதனால் அப்பகுதியில் உள்ள பொதுமக்கள் ஆத்திரமடைந்து நேற்று அந்த வழியாக வந்த 20க்கும் மேற்பட்ட லாரிகளை சிறைப்பிடித்து போராட்டத்தில் ஈடுபட்டுள்ளனர்.
இந்த சம்பவம் குறித்து தகவல் அறிந்ததும் மருவத்தூர் காவல்துறையினர் மற்றும் சம்பந்தப்பட்ட அதிகாரிகள் சம்பவ இடத்திற்கு விரைந்து வந்து பொதுமக்களிடம் பேச்சுவார்த்தை நடத்தியுள்ளனர். இந்த பேச்சுவார்த்தையில் இனிமேல் டிப்பர் லாரிகள் மெதுவாகவும் சரியான அளவு பாரம் ஏற்றிச் செல்வதற்கும் உரிய நடவடிக்கை எடுக்கப்படும் என்று அதிகாரிகள் உறுதி அளித்ததின்பேரில் பொதுமக்கள் சிறைப்பிடித்த லாரிகளை விடுவித்து கலைந்து சென்றுள்ளனர்.