தமிழகத்தில் 6 முதல் 8 ஆம் வகுப்பு மாணவர்களுக்கு அடுத்த வாரத்தில் பள்ளிகள் திறக்கப்படும் என்று பள்ளிக் கல்வித்துறை அறிவித்துள்ளது.
தமிழகத்தில் கொரோனா அச்சுறுத்தல் காரணமாக கடந்த மார்ச் மாதம் பள்ளி மற்றும் கல்லூரிகள் அனைத்தும் மூடப்பட்டன. அதனால் மாணவர்கள் அனைவருக்கும் ஆன்லைன் மூலமாக வகுப்புகள் நடத்தப்பட்டு வந்தன. இதற்கு மத்தியில் 10 மற்றும் 12ஆம் வகுப்பு மாணவர்களுக்கு பொதுத்தேர்வு நெருங்கிக் கொண்டிருப்பதால், மாணவர்களின் பெற்றோர்களிடம் பள்ளிகள் திறப்பது பற்றி கருத்து கேட்கப்பட்டது.
அதற்கு 90% பெற்றோர்கள் சம்மதம் தெரிவித்த நிலையில் ஜனவரி 19ஆம் தேதி 10 மற்றும் 12ஆம் வகுப்பு மாணவர்களுக்கு பள்ளிகள் திறக்கப்பட்டது. தற்போது அரசு பள்ளிகளில் 92 சதவீத மாணவர்கள் வருகை புரிந்துள்ளதால் வகுப்புகள் நடந்து கொண்டிருக்கின்றன.
இதனையடுத்து 9 மற்றும் 11ஆம் வகுப்பு மாணவர்களுக்கு கடந்த பிப்ரவரி 8-ஆம் தேதி பள்ளிகள் திறக்கப்பட்டு வகுப்புகள் நடந்து கொண்டிருக்கின்றன. இந்நிலையில் ஆறு முதல் எட்டாம் வகுப்பு மாணவர்களுக்கு அடுத்த வாரத்தில் பள்ளிகள் திறக்கப்படும் என்று பள்ளிக் கல்வித்துறை அறிவித்துள்ளது. மேலும் ஆறு முதல் எட்டாம் வகுப்பு மாணவர்களுக்கு 50 சதவீதம் வரை பாடத்திட்டம் குறைக்க பட்டுள்ளதாகவும் பள்ளி கல்வித்துறை அறிவித்துள்ளது.