டயர் பஞ்சர் ஆனதால் கட்டுப்பாட்டை இழந்த கார் வயலில் தலைகுப்புற கவிழ்ந்த சம்பவம் பரபரப்பை ஏற்படுத்தியுள்ளது.
தூத்துக்குடி மாவட்டத்தைச் சேர்ந்த முகமது இஸ்மாயில் என்பவரின் மகனான அப்துல் காதர் சென்னையில் வசித்து வந்துள்ளார். அவர் சில நாட்களுக்கு முன்பு காயல்பட்டினத்திற்கு வந்து தங்கியிருந்து மீண்டும் சென்னைக்கு தனது நண்பர்களான சிவா, சதீஷ், கார்த்திக், ஜாகிர், ஹாஜி ஆகியோருடன் புறப்பட்டுள்ளார். இவர்களது காரானது செய்துங்கநல்லூர் அருகிலுள்ள தூதுகுழி சாலை வளைவில் சென்று கொண்டிருந்த போது, திடீரென காரின் டயர் பஞ்சர் ஆனது.
இதனால் கட்டுப்பாட்டை இழந்த கார் சாலை தடுப்புசுவரை தாண்டி அருகில் இருந்த வயலில் தலைகுப்புற கவிழ்ந்து விட்டது. இந்த விபத்தில் காரில் பயணித்த அனைவரும் காயம் ஏற்படாமல் அதிர்ஷ்டவசமாக உயிர் தப்பி விட்டனர். இச்சம்பவம் குறித்து தகவல் அறிந்த செய்துங்கநல்லூர் போலீசார் சம்பவ இடத்திற்கு விரைந்து சென்று விசாரணை நடத்தியுள்ளனர். அதன் பின்னர் வயலில் இருந்து கார் வெளியே எடுக்கப்பட்டுள்ளது.