பேருந்துகளில் செல்லும் மாணவர்கள் ஆபத்தை உணராமல் படிக்கட்டில் தொங்கியபடி பயணம் செய்வது அதிர்ச்சியை ஏற்படுத்தியுள்ளது.
தமிழகத்தில் கொரோனா தொற்று காரணமாக கடந்த மார்ச் மாதம் முதல் ஊரடங்கு அமல்படுத்தப்பட்டு பள்ளிகள் மூடப்பட்டது. அதன்பிறகு படிப்படியாக தொற்று குறைந்ததால் பொதுத்தேர்வு எழுதும் பத்தாம் வகுப்பு மற்றும் பன்னிரண்டாம் வகுப்பு மாணவர்களுக்கு கடந்த மாதம் 19ஆம் தேதி பள்ளிகள் திறக்கப்பட்டுள்ளன. இதனையடுத்து கடந்த 8ஆம் தேதி ஒன்பதாம் வகுப்பு மற்றும் 11 ஆம் வகுப்பு மாணவர்களுக்கு பள்ளிகள் திறக்கப்பட்டுள்ளன. இந்நிலையில் விருதுநகர் மாவட்டத்திலுள்ள சிங்கம்புணரியில் பேருந்துகளில் பள்ளிகளுக்கு செல்லும் மாணவர்கள் கூட்டம் அலைமோதுகிறது.
மேலும் அதிக அளவு மாணவர்கள் பேருந்தில் பயணம் செய்வதால் நிற்பதற்கு கூட இடமின்றி படிக்கட்டில் தொங்கியவாறு பயணம் செய்கின்றனர். இது குறித்து சமூக ஆர்வலர் பாலா என்பவர் கூறும்போது, தொற்று குறைந்ததால் தமிழகம் பழைய நிலைக்கு திரும்பி வருகிறது என கூறியுள்ளார். இதனையடுத்து பள்ளிகள் திறக்கப்பட்டதால் குறைவாக இயக்கப்படும் பேருந்துகளில் அதிகமான மாணவர்கள் மற்றும் பொதுமக்கள் செல்ல வேண்டிய நிலை ஏற்பட்டுள்ளது. இதனால் மாணவர்கள் ஆபத்தை உணராமல் படிக்கட்டில் நின்றவாறு பயணம் செய்வதால் சிங்கம்புணரியில் இருந்து சுற்றுவட்டார பகுதிகளுக்கு கூடுதல் பேருந்துகளை இயக்க உரிய நடவடிக்கை எடுக்க வேண்டும் என அவர் கூறியுள்ளார்.