திமுக பொதுச்செயலாளர் துரைமுருகன் சிரித்த முகத்துடன் கையில் வேலுடன் இருக்கும் புகைப்படம் சமூகவலைத்தளங்களில் வைரலாகி வருகிறது.
தமிழகத்தில் மிக விரைவில் சட்டமன்ற தேர்தல் நடைபெற உள்ளது. அதனால் அனைத்துக் கட்சிகளும் தீவிர தேர்தல் பிரசாரத்தில் ஈடுபட்டு வருவதால் தேர்தல் களம் சூடு பிடிக்க தொடங்கியுள்ளது.ஒவ்வொரு கட்சியினரும் தங்கள் எதிர்க்கட்சியினர் கடுமையாக விமர்சித்து தேர்தல் பிரசாரம் செய்து வருகிறார்கள். அதிலும் குறிப்பாக அதிமுக மற்றும் திமுக இடையே கடும் மோதல் போக்கு நிலவி வருகிறது.
இதற்கு மத்தியில் சொத்துக்குவிப்பு வழக்கில் சிறை தண்டனை அனுபவித்து கொண்டிருந்த சசிகலா கடந்த ஜனவரி 27-ஆம் தேதி விடுதலையானார். அதன்பிறகு பிப்ரவரி 8-ஆம் தேதி தமிழகம் திரும்பினார். அவரின் வருகை அரசியலில் ஏதாவது மாற்றத்தை ஏற்படுத்தும் என அனைவரும் குழப்பத்தில் உள்ளனர்.
இந்நிலையில் தமிழகத்தில் மதத்தை வைத்து அரசியல் செய்யும் கட்சிகளும், மதச்சார்பற்ற கட்சிகளும் ஒரே நேரத்தில் தற்போது வேல் அரசியலில் ஈடுபட்டுள்ளன. கருணாநிதி போல் மஞ்சள் துண்டை தோளில் போட்டுக் கொண்டு, திமுக பொதுச்செயலாளர் துரைமுருகன் சிரித்த முகத்துடன் கையில் வேலுடன் காட்சி அளிக்கும் புகைப்படம் சமூக வலைதளங்களில் வேகமாக பரவி வருகிறது. இதைப்பார்த்த நெட்டிசன்கள் “அரோகரா அறிவாலயம்”என்று பதிவிட்டு வருகிறார்கள்.