சட்டவிரோதமாக மணல் அள்ளிய வாலிபரை காவல்துறையினர் கைது செய்து விசாரணை நடத்தி வருகின்றனர்.
திண்டுக்கல் மாவட்டத்திலுள்ள வடமதுரை காவல்துறையினர் நல்லாம்பட்டி கிராமத்தில் ரோந்து பணியில் ஈடுபட்டுள்ளனர். அப்போது அங்குள்ள குளத்தில் பொக்லைன் எந்திரங்கள் மூலம் சில நபர்கள் மணல் அள்ளி கொண்டிருந்தனர். இந்த மணலை அவர்கள் டிப்பர் லாரி மூலம் கடத்த முயன்றுள்ளனர். இதனை கண்ட காவல்துறையினர் அவர்களை மடக்கிப் பிடிக்க முயன்றபோது லாரியுடன் டிரைவர் தப்பியுள்ளார்.
மேலும் பொக்லைன் எந்திர டிரைவர் பிடிபட்டுள்ளார். இதனையடுத்து காவல்துறையினர் அவரிடம் விசாரணை நடத்தியபோது அவர் கார்த்திக்ராஜா என்பதும் அப்பகுதியில் சட்டவிரோதமாக மணல் அள்ளியதும் தெரிய வந்துள்ளது. இதனையடுத்து காவல்துறையினர் கார்த்திக்ராஜாவை கைது செய்து பொக்லைன் எந்திரத்தை பறிமுதல் செய்துள்ளனர். மேலும் தப்பி ஓடிய லாரி டிரைவரை தீவிரமாக தேடி வருகின்றனர்.