ஊரணி அருகே உள்ள மெயின் ரோட்டில் குப்பைகளை கொட்டுவதால் வாகன ஓட்டிகள் பாதிக்கப்படுவதுடன், நீர் மாசுபட்டு நோய் பரவும் அபாயம் ஏற்பட்டுள்ளது.
விருதுநகர் மாவட்டத்திலுள்ள சாத்தூர் ஏழாயிரம் பண்ணை மெயின் ரோட்டின் முகப்பு பகுதியில் குப்பைகளை ஒரே இடத்தில் கொட்டுவதால் அந்த சாலையின் வழியாக கோட்டைப்பட்டி, சங்கரன்கோவில், கோவில்பட்டி, திருவேங்கடம் போன்ற பல ஊர்களுக்கு இயக்கப்படும் பேருந்துகள் பாதிக்கப்பட்டுள்ளன. மேலும் குப்பைகளை ரோட்டில் ஒரு இடத்தில் கொட்டி எரிப்பதனால் அது போக்குவரத்திற்கு இடையூறாக இருப்பதுடன் வாகன ஓட்டிகளுக்கு மிகுந்த சிரமத்தை ஏற்படுத்துகிறது.
அதோடு குப்பைகளை எரிப்பதிலிருந்து வரும் புகையினால் வாகன ஓட்டிகளுக்கு கண்களில் எரிச்சல் ஏற்பட்டு விபத்து ஏற்பட அதிக வாய்ப்புள்ளது. இந்த குப்பைகளை ஊரணி பகுதியில் கொட்டுவதால் ஊரணியின் நீர் மாசுபடுவதோடு, அந்த நீரினை குடிக்கும் கால்நடைகளுக்கும் இது ஆபத்தை ஏற்படுத்தியுள்ளது. மேலும் மாசடைந்த இந்த நீரினால் மனிதர்களுக்கும் தொற்று நோய் பரவும் அபாயம் ஏற்பட்டுள்ளதால் சம்பந்தப்பட்ட அதிகாரிகள் உரிய நடவடிக்கை எடுக்க வேண்டும் என பொதுமக்கள் மற்றும் வாகன ஓட்டிகள் சார்பில் கோரிக்கை விடுக்கப்பட்டுள்ளது.