சங்கிலி பறிப்பு வழக்கில் தப்பிச் சென்றவரை காவல்துறையினர் அதிரடியாக கைது செய்துள்ளனர்.
புதுக்கோட்டை மாவட்டத்தில் உள்ள கீரனூர் கிராமத்தில் வசித்து வருபவர் ராமச்சந்திரன். இவருடைய மனைவியான சத்யா கடைவீதிக்கு நடந்து சென்று கொண்டிருக்கும்போது இருசக்கரவாகனத்தில் வந்த மர்மநபர்கள் அவர் அணிந்திருந்த தங்கச் சங்கிலியை பறித்துச் கொண்டு தப்ப முயன்றுள்ளனர். அப்போது சத்யா கூச்சலிட்டதால் அக்கம்பக்கத்தினரால் ஒருவர் பிடிக்கப்பட்டுள்ளார். மேலும் மற்றொருவர் தப்பிச் சென்றுவிட்டார். அதன்பின் பிடிபட்டவரை பொதுமக்கள் காவல்துறையினரிடம் ஒப்படைத்துள்ளனர்.
இதனையடுத்து காவல்துறையினர் நடத்திய விசாரணையில் அவர் நந்தகுமார் என்பது தெரியவந்துள்ளது. மேலும் தப்பிச்சென்றவரை பிடிக்க காவல்துறையினர் தனிப்படை அமைத்து தீவிர தேடுதல் வேட்டையில் ஈடுபட்டு கொண்டிருந்தபோது ஸ்ரீரங்கம் பகுதியில் தப்பிச்சென்ற வேலுச்சாமியை பதுங்கி இருப்பது தெரியவந்துள்ளது. இதனையடுத்து காவல்துறையினர் அவரை கைது செய்துள்ளனர். மேலும் அவரிடம் இருந்த தங்க சங்கிலியை மீட்டு சத்யாவிடம் காவல்துறையில் ஒப்படைத்துள்ளனர்.