ராணிப்பேட்டையில் வாகன சோதனையின் போது சிக்கன் கடைக்காரரிடம் இருந்து ஆவணம் இல்லாத பணத்தை தேர்தல் பறக்கும் படை அதிகாரிகள் பறிமுதல் செய்துள்ளனர்.
ராணிப்பேட்டை பகுதியில் வசித்து வரும் ரபீக் அகமது என்பவர் சிக்கன் கடை வைத்து நடத்தி வருகிறார். இவர் கடந்த 9-ஆம் தேதி அன்று ராணிப்பேட்டைக்கு காரில் சென்றுள்ளார். அப்போது தேர்தல் பறக்கும் படை அதிகாரிகள் ராணிப்பேட்டை பாலாறு அருகே வாகன சோதனையில் ஈடுபட்டு கொண்டிருந்தனர். அப்போது அங்கு வந்த ரபீக் அகமது காரை நிறுத்தி அதிகாரிகள் சோதனை நடத்தினர். சோதனையில் அவரிடம் ரூ. 7 லட்சத்து 1,320 இருந்தது தெரியவந்தது.
அந்த பணம் குறித்து அவரிடம் அதிகாரிகள் விசாரணை நடத்தினர். அந்த விசாரணையில் அவரிடம் பணத்திற்கான உரிய ஆவணம் எதுவும் இல்லை என்பது தெரியவந்தது. இதையடுத்து தேர்தல் பறக்கும் படை அதிகாரிகள் அந்த பணத்தை பறிமுதல் செய்தனர். அதன் பின் பறிமுதல் செய்யப்பட்ட பணத்தை தாசில்தார் ஜெயபிரகாஷிடம் தேர்தல் பறக்கும் படை அதிகாரிகள் ஒப்படைத்தனர்.