மோட்டார் சைக்கிள் மீது கார் மோதிய விபத்தில் ஆம்புலன்ஸ் டிரைவர் உயிரிழந்த சம்பவம் சோகத்தை ஏற்படுத்தியுள்ளது.
தென்காசி மாவட்டத்திலுள்ள சிந்தாமணி காட்டு நாயக்கர் தெருவில் குருசாமி என்பவர் வசித்து வருகிறார். இவருக்கு மனைவி மற்றும் இரண்டு குழந்தைகள் இருக்கின்றனர். இவர் இலத்தூர் பகுதியில் உள்ள ஆரம்ப சுகாதார நிலையத்தில் ஆம்புலன்ஸ் ஓட்டுனராக வேலை பார்த்து வந்துள்ளார். இந்நிலையில் குருசாமி தனது மோட்டார் சைக்கிளில் புளியங்குடியில் இருந்து இலத்தூர் நோக்கி சென்றுள்ளார். அப்போது இவரது மோட்டார் சைக்கிள் கொல்லம் திருமங்கலம் தேசிய நெடுஞ்சாலையில் சென்று கொண்டிருந்தபோது, அவ்வழியாக வேகமாக சென்ற கார் இவரின் மோட்டார் சைக்கிள் மீது பலமாக மோதியது.
இதில் பலத்த காயமடைந்த அவரை அருகில் உள்ளவர்கள் மீட்டு நெல்லை அரசு மருத்துவமனைக்கு சிகிச்சைக்காக கொண்டு சென்றனர். இதனையடுத்து மருத்துவமனையில் அவருக்கு அளிக்கப்பட்ட சிகிச்சை பலனளிக்காமல் குருசாமி பரிதாபமாக உயிரிழந்து விட்டார். மேலும் இச்சம்பவம் குறித்து சொக்கம்பட்டி காவல்துறையினர் வழக்குப்பதிவு செய்து தீவிர விசாரணை மேற்கொண்டு வருகின்றனர்.