எப்படி இங்க வந்துச்சு..? கடலில் மிதந்து வந்த பொட்டலம்… கடலோர காவல்துறை விசாரணை..!!

நாகை அருகே கடலில் மிதந்து வந்த இரண்டு கஞ்சா பொட்டலங்களை காவல்துறையினர் பறிமுதல் செய்துள்ளனர்.

நாகப்பட்டினம் மாவட்டத்தில் உள்ள காமேஸ்வரத்தில் மீன்பிடிப்பதற்காக மீனவர்கள் கடலுக்கு சென்றுள்ளனர். அப்போது இரண்டு பாலித்தீன் பை பொட்டலங்கள் காமேஸ்வரத்திலிருந்து 2 நாட்டிக்கல் மைல் தூரத்தில் கடலில் மிதந்து வந்துள்ளது. அதை பார்த்த மீனவர்கள் அந்த பாலித்தீன் பை பொட்டலங்களை எடுத்து கீழையூர் பகுதியில் உள்ள கடலோர காவல்துறையினரிடம் ஒப்படைத்துள்ளனர்.

காவல்துறையினர் அந்த பைகளை பிரித்து பார்த்தபோது இரண்டு பையிலும் 2 கிலோ வீதம் 4 கிலோ கஞ்சா இருப்பது தெரியவந்தது. இதையடுத்து காவல்துறையினர் கஞ்சா பொட்டலங்களை பறிமுதல் செய்தனர். அந்த கஞ்சாவின் மதிப்பு ரூ. 30 ஆயிரம் இருக்கும் என கூறப்படுகிறது. இதையடுத்து அந்த கஞ்சா பொட்டலங்கள் படகில் கடத்தி சென்ற போது தவறி விழுந்ததா ? விற்பனைக்கு எடுத்துச் சென்றபோது காவல்துறையினரை கண்டவுடன் வீசிவிட்டு சென்றனர் ? என்பது குறித்து காவல்துறையினர் விசாரணை நடத்தி வருகின்றனர்.