முதுமலை வனப்பகுதியில் குட்டி யானை இறந்து கிடந்த சம்பவம் அதிர்ச்சியை ஏற்படுத்தி உள்ளது.
நீலகிரி மாவட்டத்தில் உள்ள முதுமலை புலிகள் காப்பகத்துக்கு உட்பட்ட தமிழக-கர்நாடக எல்லையான கக்கநல்லா வனப்பகுதியில் வனத்துறையினர் ரோந்து பணியில் ஈடுபட்டுள்ளனர். அப்போது அங்குள்ள ஒரு குட்டை பக்கத்தில் குட்டி யானை ஒன்று இறந்து கிடந்ததை கண்டு அதிர்ச்சி அடைந்தனர். இது குறித்து உயர் அதிகாரிகளுக்கு வனத்துறையினர் தகவல் தெரிவித்ததையடுத்து, தெப்பக்காடு வனச்சரகர் மனோஜ் மற்றும் வனத்துறையினர் சம்பவ இடத்திற்கு விரைந்து வந்து பார்வையிட்டனர். இந்நிலையில் அங்கு இறந்து கிடப்பது இரண்டு வயது மதிக்கத்தக்க பெண் குட்டியானை என்பதும், அந்த இடத்தில் புலிகளின் கால்தடங்கள் இருந்ததும் அதிகாரிகள் கண்டுபிடித்துள்ளனர்.
மேலும் குட்டி யானையின் உடலின் முன் மற்றும் பின்பக்க பாகங்களை புலி கடித்து தின்றதற்கான அடையாளங்கள் இருந்துள்ளது. இதனையடுத்து மருத்துவ குழுவினர் வரவழைக்கப்பட்டு கால்நடை மருத்துவர் கோசல்ராம் தலைமையில் குட்டி யானையின் உடல் பிரேத பரிசோதனை செய்யப்பட்டுள்ளது. இது குறித்து வனத்துறையினர் கூறும்போது, இந்த குட்டி யானையை கடந்த மூன்று நாட்களுக்கு முன்பு புலி அடித்து கொன்று இருக்கலாம் எனவும், குட்டி யானையின் முக்கிய உடற்பாகங்கள் பிரேத பரிசோதனைக்காக சேகரிக்கப்பட்டு அதன் அறிக்கை வந்த பிறகு யானை இறந்ததற்கான உண்மையான காரணம் தெரியவரும் எனவும் கூறியுள்ளார். மேலும் இச்சம்பவம் குறித்து வனத்துறை அதிகாரிகள் தீவிர விசாரணை மேற்கொண்டு வருகின்றனர்.