100 சதவீத வாக்குப் பதிவை உறுதிப்படுத்தும் வண்ணம் மினி மாரத்தான் ஓட்ட நிகழ்ச்சி நடைபெற்றுள்ளது.
தமிழகத்தில் சட்டமன்ற தேர்தல் வருகிற ஏப்ரல் மாதம் 6-ஆம் தேதி நடைபெற உள்ளது. இதற்காக 100 சதவீத வாக்குப் பதிவை உறுதிப்படுத்தும் வண்ணம் பல்வேறு விழிப்புணர்வு நிகழ்ச்சிகள் நடைபெற்றுக் கொண்டிருக்கிறது. இந்நிலையில் விருதுநகர் மாவட்டத்தில் உள்ள செந்தில்குமார் நாடார் கல்லூரியில் 500-க்கும் மேற்பட்ட கல்லூரி மாணவ மாணவிகள் பங்கேற்ற மினி மாரத்தான் நிகழ்ச்சி நடைபெற்றுள்ளது. இதனை கலெக்டர் கண்ணன் துவங்கி வைத்துள்ளார்.
இதனையடுத்து வாக்களிப்பதன் அவசியம் குறித்து பொதுமக்களுக்கு விழிப்புணர்வை ஏற்படுத்தும் வகையில் விழிப்புணர்வு வாசகங்கள் அடங்கிய டீ-ஷர்ட் மற்றும் தொப்பிகளை அணிந்து கொண்டு மாணவர்கள் கல்லூரியில் இருந்து தலைமை மருத்துவமனை, மாரியம்மன் கோவில் தெப்பக்குளம், கருமாதி மடம், புதிய பேருந்து நிலையம் வழியாக 6 கிலோ மீட்டர் தூரம் ஓடிச்சென்று மாவட்ட விளையாட்டு அரங்கை சென்றடைதுள்ளனர். அதன்பின் மாவட்ட விளையாட்டு அரங்கில் வைத்து வாக்காளர் விழிப்புணர்வு உறுதிமொழி எடுக்கப்பட்டுள்ளது. மேலும் நிகழ்ச்சியில் பங்கேற்ற அனைவருக்கும் பாராட்டுச் கலெக்டர் சான்றிதழ்களை வழங்கி உற்சாகப்படுத்தி உள்ளார்.