மயிலாடுதுறை மாவட்டம் திருக்கடையூர் அருகே மோட்டார் சைக்கிளிலிருந்து நிலைதடுமாறி கீழே விழுந்த வாலிபர் பரிதாபமாக உயிரிழந்த சம்பவம் சோகத்தை ஏற்படுத்தியுள்ளது.
மயிலாடுதுறை மாவட்டத்தில் உள்ள தரங்கம்பாடியில் பிச்சைக்காரன் என்பவர் வசித்து வருகிறார். இவருக்கு இளவரசன் (26) என்ற மகன் இருந்தார். சம்பவத்தன்று இவரும் வ.உ.சி. தெருவில் வசித்து வரும் பாக்யராஜ் என்பவரது மகன் ஸ்ரீராமும் துக்க நிகழ்ச்சி ஒன்றில் கலந்து கொள்வதற்காக மோட்டார் சைக்கிளில் சென்றுள்ளனர். அதன்பின் அங்கிருந்து திரும்பி வந்து கொண்டிருந்தனர். அப்போது இளவரசன் மோட்டார்சைக்கிளை ஓட்டியுள்ளார். சின்னங்குடி பகுதியில் உள்ள மெயின் ரோட்டிற்கு மோட்டார் சைக்கிள் வந்த போது எதிர்பாராதவிதமாக நிலை தடுமாறியது. இதில் 2 பேரும் மோட்டார் சைக்கிளில் இருந்து கீழே விழுந்தனர்.
இந்த விபத்தால் இரண்டு பேருக்கும் பலத்த காயங்கள் ஏற்பட்டுள்ளது. அதனைக் கண்ட அக்கம் பக்கத்தினர் அவர்களை மீட்டு 108 ஆம்புலன்ஸ் மூலம் மயிலாடுதுறை அரசு மருத்துவமனைக்கு சிகிச்சைக்காக அனுப்பி வைத்தனர். அதன்பின் அங்கிருந்து திருவாரூர் மருத்துவமனைக்கு அவர்கள் மேல் சிகிச்சைக்காக அனுப்பி வைக்கப்பட்டனர். அங்கு சிகிச்சை பலனளிக்காமல் இளவரசன் பரிதாபமாக உயிரிழந்தார். ஸ்ரீராம் மருத்துவமனையில் சிகிச்சை பெற்று வருகிறார். இந்த விபத்து குறித்து காவல்துறையினர் வழக்குப்பதிந்து விசாரணை மேற்கொண்டு வருகின்றனர்.