நாகையில் தேர்தல் புறக்கணிப்பு அறிவிப்பு “பேட்ஜ்” அணிந்து ஒப்பந்த தொழிலாளர்கள் சி.பி.சி.எல் ஆலை வளாகத்தில் ஆர்ப்பாட்டத்தில் ஈடுபட்டனர்.
நாகப்பட்டினம் மாவட்டத்தில் உள்ள பனங்குடியில் சென்னை எண்ணெய் சுத்திகரிப்பு ஆலை ஒன்று செயல்பட்டு வருகிறது. இந்த ஆலையில் 150-க்கும் மேற்பட்ட தொழிலாளர்கள் ஆலை விரிவாக்கம் செய்ய உள்ள காரணத்தினால் பணிநீக்கம் செய்யப்பட்டுள்ளனர். இதனால் தற்போது பணி புரியும் ஒப்பந்த தொழிலாளர்களுக்கு பணி காலம் முடிவடையும் வரை உத்திரவாதத்துடன் கூடிய எழுத்துப்பூர்வ பணி வழங்க வேண்டும் என்றும், ஆலை விரிவாக்கம் காரணமாக வேலையை இழந்தவர்களுக்கு உரிய இழப்பீடு வழங்க வேண்டும் என்றும் சி.பி.சி.எல் அமைப்புசாரா ஒப்பந்த தொழிலாளர்கள் நல சங்கம் சார்பில் போராட்டங்கள் நடைபெற்று வருகிறது.
இந்நிலையில் சி.பி.சி.எல் அமைப்புசாரா ஒப்பந்த தொழிலாளர்கள் கோரிக்கைகளை நிறைவேற்றாததை கண்டித்து தேர்தலை புறக்கணிக்க போவதாக அறிவித்துள்ளனர். இதனைத் தொடர்ந்து சி.பி.சி.எல் அலுவலகத்தில் ஒப்பந்த தொழிலாளர்கள் தேர்தல் புறக்கணிப்பு “பேட்ஜ்” அணிந்து ஆர்ப்பாட்டத்தில் ஈடுபட்டனர். இந்த ஆர்ப்பாட்டத்தில் பொதுச் செயலாளர் கண்ணன், அமைப்புசாரா ஒப்பந்த தொழிலாளர்கள் சங்கத் தலைவர் பாலசுப்பிரமணியன் ஆகியோர் தலைமை தாங்கினர். இதில் ஆலை நிர்வாகத்தை கண்டித்து ஒப்பந்த தொழிலாளர்கள் கோஷங்கள் எழுப்பினர். அதன்பின் அனைவரும் கலைந்து சென்றனர்.