காதலிக்கு மாப்பிள்ளை பார்த்த பெற்றோர்.. மலேசியாவிலிருந்து பறந்து வந்த காதலன்.. என்ன செய்தார் தெரியுமா..?

கரூரில் 5 வருடங்களாக காதலித்த இளம்ஜோடி திருமணம் செய்துகொண்டு காவல்நிலையத்தில் தஞ்சம் அடைந்துள்ளனர். 

கரூர் மாவட்டத்தில் உள்ள குளித்தலைக்கு அடுத்திருக்கும் தெலுங்குப்பட்டியில் வசிக்கும் சுப்பிரமணி என்பவரது மகன் சரவணகுமார். இவர் பொறியியல் பட்டப்படிப்பை முடித்துவிட்டு மலேசியாவில் உள்ள தனியார் நிறுவனம் ஒன்றில் வேலை செய்து வருகிறார். இவர் தன் உறவினர் பெண்ணான சிந்தியா என்பவரை கடந்த 5 வருடங்களாக காதலித்து வருகிறார்.

ஆனால் இவர்களின் காதலுக்கு எதிர்ப்பு தெரிவித்த சிந்தியாவின் பெற்றோர், உடனடியாக அவருக்கு மாப்பிள்ளை பார்த்துள்ளனர். அதன் பின்பு திருமணமும் ஏற்பாடு செய்யப்பட்டது. இதனைத் தொடர்ந்து சிந்தியா தொலைபேசியில் சரவணகுமாருக்கு விஷயத்தை தெரியப்படுத்தியுள்ளார்.

இதனால் உடனடியாக கடந்த 8-ஆம் தேதியன்று சரவணகுமார் விமானத்தில் இந்தியா வந்திறங்கினார். அதன்பின்பு தன் பெற்றோர்கள் சம்மதத்துடன் சிந்தியாவை திருமணம் செய்துகொண்டார். இதனையறிந்த சிந்தியாவின் குடும்பத்தினர் இருவரையும் கொலை செய்து விடுவதாகவும் மிரட்டியுள்ளனர்.

இதனால் இளம் ஜோடி பாதுகாப்பு கேட்டு காவல்நிலையத்தில் தஞ்சம் அடைந்துள்ளனர். அதன்பின்பு காவல்துறையினர் சிந்தியாவின் பெற்றோரிடம் அறிவுரை கூறி சரவணன் வீட்டிற்கு இருவரையும் அனுப்பி வைத்துள்ளனர்.