மூன்று நபரை தாக்கி விட்டு வீட்டிற்குள் நுழைந்த சிறுத்தையை வனத்துறையினர் மயக்க ஊசி போட்டு பிடித்துள்ளனர்.
வேலூர் மாவட்டத்திலுள்ள எர்த்தாங்கள் கலர்பாளையத்தில் பிரேமா என்பவர் வாழ்ந்து வருகிறார். நேற்று நள்ளிரவு வீட்டிற்கு வெளியில் உறுமல் சத்தம் கேட்டபோது வெளியில் வந்து பார்த்த பிரேமாவை சிறுத்தை தாக்கியுள்ளது. இதனால் பயத்தில் அலறிய பிரேமாவின் சத்தத்தால் அவளது மகன் மனோகர் மற்றும் மகள் மகாலட்சுமி ஆகியோர் வெளியே வந்து பார்த்த போது அவர்களையும் சிறுத்தை தாக்கியது.
அவர்களின் அலறல் சத்தம் கேட்டு அருகில் வசிப்பவர்கள் விரைந்து வந்து மூன்று பேரையும் காப்பாற்றி குடியாத்தம் அரசு மருத்துவமனையில் சேர்த்துள்ளனர். இதனிடேய சிறுத்தை வீட்டிற்குள் நுழைந்ததால் அதனை உள்ளே வைத்து பூட்டி விட்டு வனத்துறையினருக்கு தகவல் தெரிவித்தனர். வனத்துறையினர் சம்பவம் நடந்த இடத்திற்கு வந்து இரவு நேரம் என்பதால் சிறுத்தையை பிடிக்காமல் கண்காணித்து வந்துள்ளனர். அதன்பிறகு வனத்துறை அதிகாரிகள் இன்று காலை மயக்க ஊசி போட்டு சிறுத்தையை பிடித்து உள்ளனர்.