மோட்டார் சைக்கிள் மீது கார் மோதிய விபத்தில் விவசாயி பலியான சம்பவம் சோகத்தை ஏற்படுத்தியுள்ளது.
திருப்பூர் மாவட்டத்தில் உள்ள கொண்டரசம்பாளையம் பகுதியில் கதிரேசன் என்ற விவசாயி வசித்து வந்துள்ளார். இவர் தனது மாட்டிற்கு தவிடு வாங்கி விட்டு மோட்டார் சைக்கிளில் கொண்டரசம்பாளையம் நோக்கி சென்று கொண்டிருக்கும் போது பின்னால் வேகமாக வந்த கார் இவரின் மோட்டார் சைக்கிள் மீது மோதி விட்டது. இந்த விபத்தில் படுகாயமடைந்த கதிரேசனை அருகில் உள்ளவர்கள் மீட்டு தாராபுரம் அரசு மருத்துவமனைக்கு சிகிச்சைக்காக கொண்டு சென்றனர்.
இதனையடுத்து மேல் சிகிச்சைக்காக கோயம்புத்தூர் அரசு மருத்துவமனையில் அனுமதிக்கப்பட்ட கதிரேசனுக்கு மருத்துவர்கள் அளித்த சிகிச்சை பலனளிக்காமல் அவர் பரிதாபமாக உயிரிழந்து விட்டார். இச்சம்பவம் குறித்து வழக்குப்பதிவு செய்த காவல்துறையினர் விபத்தை ஏற்படுத்திய கார் ஓட்டுநரான சசி குமார் என்பவரை கைது செய்து விசாரணை நடத்தி வருகின்றனர்.