தமிழகத்தில் கடந்த ஆண்டு மார்ச் மாதம் கொரோனா அச்சுறுத்தல் காரணமாக ஊரடங்கு அமல்படுத்தப்பட்டது. அப்போது பலத்த கட்டுப்பாடுகள் விதிக்கப்பட்டன. அதன்பிறகு கொரோனா பாதிப்பு சற்று குறைந்த நிலையில்,ஊரடங்கு தளர்வுகளை தமிழக அரசு படிப்படியாக அறிவித்து வந்தது. அதன்படி பல்வேறு தளர்வுகள் அறிவிக்கப்பட்டன. ஆனால் கடந்த ஒரு மாதமாக தமிழகத்தில் கொரோனா பாதிப்பு புதிய உச்சத்தை தொட்டுள்ளது.
அதனால் மீண்டும் ஊரடங்கு கட்டுப்பாடுகள் விதிக்கப் படும் சூழல் உருவாகியது. இதனையடுத்து தமிழகம் முழுவதிலும் இரவு 10 மணி முதல் அதிகாலை 4 மணி வரை இரவு நேர ஊரடங்கு அமல்படுத்தப்பட்டு உள்ளது. அது மட்டுமன்றி பல கட்டுப்பாடுகளும் விதிக்கப்பட்டுள்ளன. இவை அனைத்தும் கடந்த ஏப்ரல் 20ஆம் தேதி அமலுக்கு வந்தது. மேலும் தமிழகத்தில் கொரோனா பரவலை கட்டுப்படுத்த கடந்த 26 ஆம் தேதி முதல் பல கட்டுப் பாடுகளுடன் கூடிய ஊரடங்கு அமலுக்கு வந்துள்ளது.
இந்நிலையில் சென்னையில் சுனாமி போன்ற கொரோனா பரவி வருவதாக சற்றுமுன் சிறப்பு அதிகாரி சித்திக் அதிர்ச்சி அறிவிப்பை வெளியிட்டுள்ளார். சென்னையில் கொரோனாவால் பாதிக்கப்பட்டவர்களில் 25 ஆயிரம் பேர் வீடுகளில் தனிமைப்படுத்தப்பட்டு சிகிச்சை பெறுகின்றனர். விருந்தினர்களையும் கூட்டமாக கூடுவதையும் தவிருங்கள். மக்கள் மிக எச்சரிக்கையுடன் இருக்க வேண்டும் என தெரிவித்துள்ளார்.
இந்நிலையில் கொரோனா பற்றிய தகவல்களை அறிந்துகொள்ள அதிகாரப்பூர்வ வலைதளம் கொடுக்கப்பட்டுள்ளது. அதன்படி covid19.chennaicorporation.gov.in என்ற வலைத்தளத்தில் சென்று அறிந்து கொள்ளலாம். உடல் அடக்கம் செய்ய பணம் கேட்டு கட்டாயப்படுத்தினால் கடும் நடவடிக்கை எடுக்கப்படும் என்றும் சென்னை மாநகராட்சி ஆணையர் பிரகாஷ் எச்சரிக்கை விடுத்துள்ளார். மேலும் வாக்கு எண்ணும் மையத்தில் பணி, பத்திரிக்கையாளர்கள் மற்றும் ஊடகத்தினர் கொரோனா பரிசோதனை கட்டாயம் என தெரிவித்துள்ளார்.