புதுக்கோட்டை மாவட்டத்தில் கடந்த ஒரு வாரமாகவே குறைந்த அழுத்த மின்சாரம் இருந்து வருவதால் மின்மாற்றி அமைத்து தர வேண்டி பொது மக்கள் கோரிக்கை விடுத்துள்ளனர்.
புதுக்கோட்டை மாவட்டத்திலுள்ள திருவரங்குளம், கடைவீதி, கோவில் வீதி மற்றும் டி.வி.எஸ் நகர் ஆகிய பகுதிகளில் கடந்த சில வாரங்களாகவே குறைந்த அழுத்த மின்சாரம் இருந்து வந்துள்ளது. இதனால் வீடுகளில் மின்விசிறி, கிரைண்டர், மிக்சி உள்ளிட்டவைகள் இயக்க முடியாத நிலை ஏற்பட்டுள்ளது. மேலும் மின் மோட்டாரை இயக்க முடியாததால் தண்ணீர் தட்டுப்பாடு நிலவி வருவது மட்டுமின்றி அடிக்கடி மின்சாதன பொருட்கள் பழுதாகி விடுகின்றது.
இதனால் குழந்தைகள் முதல் பெரியவர்கள் வரை அனைவரும் சிரமப்படுவதால் மின்மாற்றி அமைத்து தர வேண்டி பொது மக்கள் கோரிக்கை விடுத்துள்ளனர். இதனையடுத்து மின்சார குறைபாட்டை உடனடியாக சரி செய்ய வில்லை என்றால் விவசாயிகள், பொதுமக்கள் என அனைவரும் ஒன்று சேர்ந்து போராட்டம் நடத்துவோம் என எச்சரிக்கை விடுத்துள்ளனர்.