புயல் மழையின் காரணமாக சீனாவில் 11 பேர் உயிரிழந்த சம்பவம் சோகத்தை ஏற்படுத்தியுள்ளது.
சீனாவில் கிழக்கு பகுதியில் உள்ள கியாம் மாகாணத்தில் நேற்று முன்தினம் சக்தி வாய்ந்த புயல் வீசியுள்ளது. இந்த புயலானது மணிக்கு 162 கிலோ மீட்டர் வேகத்தில் சூறாவளி காற்று வீசியுள்ளது. இந்த புயலினால் மரங்கள் வேரோடு சாய்ந்து மின்கம்பங்கள் சரிந்து விழுந்துள்ளது. மேலும் இந்த புயலை தொடர்ந்து அங்கு கன மழை பெய்துள்ளதால் நீர்நிலைகள் அனைத்தும் நிரம்பி ஊருக்குள் வெள்ளம் புகுந்து 300க்கும் மேற்பட்ட வீடுகள் வெள்ளத்தில் மூழ்கியுள்ளன.
மேலும் சாலைகளில் வெள்ளம் ஆறாக ஓடியதால் போக்குவரத்து முற்றிலுமாக பாதிக்கப்பட்டுள்ளது. அதனால் இந்த வெள்ளம் காரணமாக அங்கு மின்சாரம் துண்டிக்கப்பட்டுள்ளது. இந்தப் புயல் மழையினால் அங்கு 11 பேர் உயிரிழந்ததாகவும் 102 பேர் படுகாயம் அடைந்ததாகவும் தகவல்கள் வெளியாகின்றன. மேலும் பாதிக்கப்பட்ட பகுதிகளில் ராணுவ வீரர்கள் குவிக்கப்பட்டு மீட்புப் பணிகள் தீவிரப்படுத்தப்பட்டுள்ளது. இதுவரை 3 ஆயிரத்திற்கும் அதிகமான மக்கள் பத்திரமாக மீட்கப்பட்டு பாதுகாப்பான இடத்தில் தங்க வைக்கப்பட்டுள்ளனர்.