தமிழகத்தில் கடந்த ஏப்ரல் 6-ஆம் தேதி நடந்து முடிந்த சட்டமன்ற தேர்தலில் வாக்கு எண்ணிக்கை கடந்த மே இரண்டாம் தேதி நடைபெற்றது. அதில் பெரும்பான்மையான தொகுதிகளில் திமுக வெற்றி பெற்றது. இதனை அடுத்து தமிழகத்தின் முதல்வராக திமுக தலைவர் ஸ்டாலின் மே 7-ஆம் தேதி பொறுப்பேற்கிறார். கொரோனா காரணமாக ஆளுநர் மாளிகையில் மிக எளிமையான முறையில் பதவி ஏற்பு விழா நடைபெற உள்ளது. இதனையடுத்து ஸ்டாலின் தனது முதல்வர் பணிகளை செய்யத் தொடங்கியுள்ளார்.
இந்நிலையில் நேற்று சென்னை அண்ணா அறிவாலயத்தில் மு .க ஸ்டாலின் தலைமையில் திமுக எம்எல்ஏக்கள் கூட்டம் தொடங்கியது. துரைமுருகன், பொன்முடி உள்ளிட்ட 133 எம்எல்ஏக்கள் கூட்டத்தில் பங்கேற்றனர். திமுக எம்எல்ஏக்கள் 125 பேருடன் உதயசூரியன் சின்னத்தில் போட்டியிட்டு வென்ற 8 பேரும் கூட்டத்தில் பங்கேற்றனர்.இதையடுத்து முறைப்படி திமுக சட்டமன்ற கட்சி தலைவராக மு.க ஸ்டாலின் தேர்ந்தெடுக்கப்பட்டார்.
இதனையடுத்து இன்று காலை 10 மணிக்கு தமிழக ஆளுநர் பன்வாரிலால் சந்தித்து திமுக தலைவர் ஸ்டாலின் ஆட்சி அமைக்க உரிமை கோருகிறார். திமுக சட்டமன்ற கட்சி தலைவராக தேர்வான கடிதத்தை ஆளுநரிடம் அளிக்க உள்ளார். தமிழக அமைச்சரவை பட்டியலையும் அவர் ஆளுநரிடம் வழங்கி ஆட்சி அமைக்க உரிமை கோருகிறார். வருகின்ற ஏழாம் தேதி ஆளுநர் மாளிகையில் தமிழக முதல்வராக பதவியேற்கிறார்.