இந்தியாவில் கடந்த ஆண்டு மார்ச்சு மாதம் கொரோனா அச்சுறுத்தல் காரணமாக ஊரடங்கு அமல்படுத்தப்பட்டது. அப்போது கட்டுப்பாடுகள் விதிக்கப்பட்டன. அதன்பிறகு கொரோனா பாதிப்பு சற்று குறைந்த நிலையில் ஊரடங்கு தளர்வு களை அரசு அறிவித்து வந்தது. ஆனால் கடந்த ஒரு மாதத்திற்கும் மேலாக இந்தியாவில் கொரோனா பாதிப்பு இதுவரை இல்லாத புதிய உச்சத்தை தொட்டுள்ளது. உலக நாடுகள் அனைத்திலும் ஒப்பிடும் போது இந்தியா அதிக அளவு கொரோனாவால் பாதிக்கப்பட்டு வருகிறது.
அதனால் அனைத்து மாநிலங்களிலும் இரவு நேர ஊரடங்கு மற்றும் வார இறுதி நாட்களில் ஊரடங்கு உள்ளிட்ட பல கட்டுப்பாடுகள் விதிக்கப்பட்டுள்ளன. அதுமட்டுமன்றி தடுப்பூசி போடும் பணி தீவிரப்படுத்தப்பட்டுள்ளது. இது ஒரு பக்கம் இருக்க, மறுபக்கம் ஆக்சிஜன் தட்டுப்பாட்டால் நாளுக்கு நாள் உயிரிழப்பு எண்ணிக்கை அதிகரித்துக் கொண்டே வருகிறது.
கொரோனா இரண்டாவது அலை அதிவேகமாக பரவிவருவதையொட்டி கேரளாவில் மே 8ம் தேதி முதல் மே 16ம் தேதி வரை முழு ஊரடங்கு என அம்மாநில அரசு உத்தரவிட்டுள்ளது. இந்நிலையில், மத்தியபிரதேசத்தில் கொரோனா பரவல் தொடர்ந்து அதிகரித்து வருவதால் இன்று முதல் முழு ஊரடங்கு அமல்படுத்தப்படுகிறது. இன்று முதல் மே 15-ம் தேதி வரை முழு ஊரடங்கு அமல்படுத்தப்படுகிறது. அத்தியாவசிய தேவைகள் தவிர மற்ற அனைத்து நடவடிக்கைகளுக்கும் தடை விதிக்கப்பட்டுள்ளதாக அம்மாநில முதலமைச்சர் சிவராஜ் சிங் சவுகான் உத்தரவிட்டுள்ளார்.