தமிழகத்தில் கொரோனா பரவல் அதிகரித்து வருகிறது. இதனால் ஞாயிறு ஊரடங்கு, இரவு ஊரடங்கு உள்ளிட்ட ஊரடங்கு நடவடிக்கைகளும், கொரோனா கட்டுப்பாட்டு நடவடிக்கைகளும் கடமையாக்கப்பட்டு வந்தது. இருப்பினும் நாளுக்கு நாள் இறப்பு வீதங்கள் அதிகரித்துக் கொண்டே வருகிறது. கொரோனாவால் பாதிக்கப்பட்டவர்களின் எண்ணிக்கையும் அதிகரிப்பதால் மருத்துவமனைகளில் கூட இடமில்லாத நிலை ஏற்பட்டுள்ளது. மேலும் ஆக்சிஜன் தட்டுப்பாடு காரணமாக கொரோனா நோயாளிகள் உயிரிழந்து வருகின்றனர்.
தற்போது முழு ஊரடங்கு அமல்படுத்தப்பட்டுள்ளது. இந்நிலையில் கொரோனாவால் பாதிக்கப்பட்டு சிகிச்சை பெற்று வரும் நோயாளிகளுக்கு ஆக்சிஜன் வழங்க பலரும் உதவி வருகின்றனர். அந்தவகையில் கொரோனா தடுப்பு பணிகளுக்காக முதலமைச்சர் நிவாரண நிதிக்கு விருப்பமுள்ளவர்கள் தாராளமாக உதவுமாறு முதல்வர் ஸ்டாலின் வேண்டுகோள் விடுத்திருந்தார். எனவே பலரும் நிதி அளித்து வருகின்றனர்.
இந்நிலையில் முதலமைச்சரின் கொரோனா நிவாரண நிதிக்காக நடிகர் அஜித் ரூபாய் 25 லட்சம் அளித்துள்ளார். வங்கி பரிவர்த்தனை மூலம் நேரடியாக முதல்வர் நிவாரண நிதிக்கு அஜித் 25 லட்சம் அனுப்பியுள்ளார். ஏற்கனவே நடிகர் சூர்யா மற்றும் அவருடைய குடும்பத்தினர் முதலமைச்சர் நிவாரண நிதிக்கு நிவாரண தொகை ஒரு கோடி நிதி வழங்கிய நிலையில் தற்போது அஜித் நிவாரண நிதி வழங்கியுள்ளார். முன்னதாக அரசு வெளியிட்ட செய்தியில் ரூ.2.5 கோடி என இருந்த தகவல், பிறகு ரூ.25 லட்சம் என திருத்தி வெளியிடப்பட்டுள்ளது.