ஊரடங்கு நேரத்தில் போக்குவரத்து இல்லாததால் ஈரோடு மாவட்டத்தில் உள்ள சாலைகள் மற்றும் கடை வீதிகள் வெறிச்சோடி காணப்பட்டது.
தமிழகத்தில் கொரோனாவின் இரண்டாவது அலை வேகமாக பரவி வருகிறது. இதனை கட்டுப்படுத்தும் பொருட்டு தமிழக அரசு முழு ஊரடங்கு அமல்படுத்தியுள்ளது. இந்த ஊரடங்கு காலத்தில் மளிகை கடைகள் மற்றும் காய்கறி கடைகள் மதியம் 12 மணி வரை மட்டுமே இயங்க அரசு அனுமதி அளித்துள்ளது.
இந்நிலையில் ஈரோடு மாவட்டத்தில் உள்ள கருங்கல்பாளையம் காவிரி ஆற்று பாலத்தில் போக்குவரத்து நெரிசல் இல்லாமல் பாலம் வெறிச்சோடி காணப்பட்டுள்ளது. மேலும் இந்தப் பகுதிக்கு வரும் ஒரு சில வாகனங்களையும் காவல்துறையினர் நிறுத்தி விசாரித்து அனுப்புகின்றனர்.
இவ்வாறாக பரபரப்பாக இருக்கும் சாலைகள், கடைவீதிகள் மக்கள் நடமாட்டமின்றி ஊரடங்கு காலத்தில் மிகவும் வெறிச்சோடி காணப்பட்டது. இந்நிலையில் ஈரோடு மேம்பாலத்தின் வழியாக வாகனங்கள் செல்லாமல் தடுப்பதற்காக காவல்துறையினர் இருபக்கமும் தடுப்பு வேலி அமைத்து உள்ளனர்.