நடிகர் கமலின் விக்ரம் படத்தில் நடிகர் விஜய் சேதுபதி வில்லனாக நடிக்க இருப்பதாக தகவல் வெளியாகியுள்ளது.
தமிழ் திரையுலகில் இயக்குனர் லோகேஷ் கனகராஜ் மாஸ்டர் படத்தின் வெற்றிக்குப் பிறகு நடிகர் கமல்ஹாசனின் விக்ரம் படத்தை இயக்குகிறார். இந்த படத்தில் பிரபல நடிகர் பகத் பாசில் முக்கிய கதாபாத்திரத்தில் நடிக்கிறார். நடிகர் கமல்ஹாசனின் ராஜ்கமல் பிலிம்ஸ் நிறுவனம் தயாரிக்கும் இந்த படத்திற்கு ராக்ஸ்டார் அனிருத் இசையமைக்கிறார். கொரோனா பரவல் குறைந்த பின் விக்ரம் படத்தின் படப்பிடிப்பை தொடங்க படக்குழு திட்டமிட்டுள்ளது.
இந்நிலையில் இந்த படத்தில் நடிகர் விஜய் சேதுபதி வில்லன் கதாபாத்திரத்தில் நடிக்க இருப்பதாக தகவல் வெளியாகியுள்ளது. மேலும் இதுகுறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது. ஏற்கனவே நடிகர் விஜய் சேதுபதி லோகேஷ் கனகராஜ் இயக்கத்தில் விஜய் நடிப்பில் வெளியான மாஸ்டர் படத்தில் வில்லனாக நடித்து அசத்தி இருந்தார் என்பது குறிப்பிடத்தக்கது. தற்போது நடிகர் விஜய் சேதுபதி விடுதலை, காத்துவாக்குல ரெண்டு காதல் உள்ளிட்ட பல திரைப்படங்களை கைவசம் வைத்துள்ளார்.