நடிகர் அஜித்தின் வீரம் படம் ஹிந்தியில் ரீமேக் செய்யப்பட உள்ளதாக தகவல் வெளியாகியுள்ளது.
தமிழ் திரையுலகில் முன்னணி கதாநாயகனாக வலம் வரும் அஜித்துக்கு ஏராளமான ரசிகர்கள் உள்ளனர். இவர் நடிப்பில் கடந்த 2014-ஆம் ஆண்டு வெளியாகி சூப்பர் ஹிட் அடித்த படம் வீரம். இயக்குனர் சிவா இயக்கியிருந்த இந்த படத்தில் தமன்னா, சந்தானம், தம்பிராமைய்யா, நாசர், விதார்த் உள்ளிட்ட பலர் நடித்திருந்தனர். இதையடுத்து இந்த படம் தெலுங்கில் பவன் கல்யாண் நடிப்பில் கட்டமராயுடு என்ற பெயரில் ரீமேக் செய்யப்பட்டு வெளியாகி ரசிகர்களிடையே நல்ல வரவேற்பை பெற்றது.
இந்நிலையில் இந்த படத்தின் ஹிந்தி ரீமேக் குறித்த தகவல் வெளியாகியுள்ளது. ‘பை ஈத் கபி தீவாளி’ என டைட்டில் வைக்கப்பட்டுள்ள இந்தப் படத்தில் முதலில் அக்ஷய்குமார் கதாநாயகனாக நடிக்க இருப்பதாக கூறப்பட்டது. இதன்பின் அவர் படத்திலிருந்து விலகிவிட்டார். தற்போது அவருக்கு பதிலாக சல்மான் கான் கதாநாயகனாக நடிக்க ஒப்பந்தமாகியுள்ளார் . மேலும் இந்த படத்தில் பூஜா ஹெக்டே கதாநாயகியாக நடிக்க இருக்கிறார். கொரோனா பரவல் குறைந்த பிறகு இந்த படத்தின் படப்பிடிப்புகள் தொடங்கப்படவுள்ளது .