கிரீஸ் நாட்டில் திடீரென ஏற்பட்ட காட்டுத் தீயை அணைக்கும் முயற்சியில் தீயணைப்பு துறையினர் தீவிரமாக ஈடுபட்டு வருகின்றனர்.
கிரீஸ் நாட்டில் பெலொபென்னீஸ் தீபகற்பத்தில் கோரிந்த் வளைகுடா பகுதியில் காடுகள் அடர்ந்த பகுதி உள்ளது. இந்த பகுதியில் நேற்று இரவு திடீரென காட்டுத்தீ பரவியுள்ளது. இந்த காட்டுத் தீ வேகமாக வீசிய காற்றினால் கோரிந்த் பகுதியில் உள்ள காடுகள் வரை மளமளவென பரவியுள்ளது இந்த காட்டு பகுதிக்கு அருகில் 6 கிராமங்களும் 2 பாடசாலைகளும் அமைந்துள்ளது.
இதில் இருந்த மக்கள் அனைவரும் வெளியேற்றப்பட்டு பாதுகாப்பான இடங்களில் தங்க வைக்கப்பட்டுள்ளனர். மேலும் இந்த தீ பரவியதில் பல கடற்கரை ரிசார்ட்டுகளும் சுற்றுலா விடுதிகளும் எரிந்து நாசமாகியுள்ளது. ஆனால் அங்குள்ள மக்கள் அனைவரும் வெளியேற்றப்பட்டு உள்ளதால் உயிரிழப்புகள் எதுவும் ஏற்படவில்லை என அதிகாரிகள் தெரிவித்துள்ளனர்.
இந்த தீயினால் நகரம் முழுவதும் புகை மண்டலமாக காட்சியளிக்கிறது. மேலும் இந்த தீயை அணைக்கும் முயற்சியில் நேற்று இரவு முதல் 150 தீயணைப்பு வீரர்களும் 62 தீயணைப்பு வண்டிகளும் 17 விமானங்களும் 3 ஹெலிகாப்டர்களும் ஈடுபட்டு வருவதாக அங்கிருந்து வரும் தகவல்கள் தெரிவிக்கின்றன.