தமிழகத்தில் கொரோனா பாதிப்பு நாளுக்கு நாள் அதிகரித்துக் கொண்டே வருவதால் கடந்த மே 10ஆம் தேதி முழு ஊரடங்கு அமல்படுத்தப்பட்டது. அது மே 23-ஆம் தேதி வரை அமலில் இருக்கும் என்று தமிழக அரசு அறிவித்துள்ளது. ஆனால் கொரோனா பாதிப்பு குறையாத பட்சத்தில், நேற்று முதல்வர் மருத்துவக் குழுவுடன் அவசர ஆலோசனை நடத்தினார். அந்த ஆலோசனைக் கூட்டத்திற்குப் பிறகு தமிழகம் முழுவதும் முழு ஊரடங்கு மே 31-ஆம் தேதி வரை நீட்டிக்கப்படுவதாக அறிவிக்கப்பட்டுள்ளது.இந்த தளர்வுகள் இல்லாத ஊரடங்கு மே 24-ஆம் தேதி அமலுக்கு வரும் என்று முதல்வர் ஸ்டாலின் அறிவித்தார்.
இதையடுத்து தமிழகத்தில் இன்று நாள் முழுவதும் அனைத்து கடைகளும் திறக்க தமிழக அரசு அனுமதி அளித்துள்ளது. நாளை முதல் ஊரடங்கு அமலுக்கு வருவதால் மக்கள் அத்தியாவசிய பொருட்களை வாங்கிக்கொள்ள இன்று தமிழகம் முழுவதும் இன்று காலை 6 மணி முதல் இரவு 9 மணி வரை காய்கறி, மருத்துவ கடைகள் உட்பட அனைத்து கடைகளையும் திறக்க தமிழக அரசு அனுமதி அளித்துள்ளது. வெளியூர் செல்லும் பயணிகளின் நலன் கருதி இன்று ஒரு நாள் முழுவதும் தனியார் மற்றும் அரசு பேருந்துகளும் இயங்க அனுமதி வழங்கப்பட்டுள்ளது. மேலும் டாஸ்மாக் கடைகள் மற்றும் பார்களை திறக்க அனுமதி வழங்கப்படவில்லை.