நடிகர் விஷால் மீது நடிகை காயத்ரி ரகுராம் பரபரப்பு குற்றச்சாட்டை வைத்துள்ளார்.
சென்னை பிஎஸ்பிபி பள்ளி ஆசிரியர் ராஜகோபாலன் பாலியல் தொல்லை கொடுத்த புகாரின் அடிப்படையில் கைது செய்யப்பட்டார். இந்த சம்பவம் சென்னையில் மிகுந்த பரபரப்பை ஏற்படுத்தியுள்ளது. இதற்காக பலரும் தங்களது கண்டனங்களை தெரிவித்து வந்த நிலையில் நடிகர் விஷால் குறித்து ட்விட்டரில் கருத்து ஒன்றை பதிவிட்டிருந்தார். அதில் சென்னை பத்மா சேஷாத்ரி பால பவன் பள்ளியில் ஆசிரியர் பாலியல் துன்புறுத்தல் என்னை மிகுந்த அச்சத்தில் ஆழ்த்தியுள்ளது. அந்த பள்ளியை மூட வேண்டும் என்பது என்னுடைய கோரிக்கை. மாணவிகள் மற்றும் பெற்றோர்களிடம் இதுவரை பள்ளி நிர்வாகம் மன்னிப்பு கேட்கவில்லை.
இது போன்ற குற்றங்களுக்கு கடுமையான நடவடிக்கை எடுக்க வேண்டும் என்று நண்பர் அன்பில் மகேசை வலியுறுத்துகிறேன் என்று குறிப்பிட்டிருந்தார். இந்த பதிவு பலரின் கவனத்தை ஈர்த்த நிலையில் நடிகையும் பாஜக பிரமுகரான காயத்ரி ரகுராம் விஷால் மீது பாலியல் குற்றச்சாட்டை வைத்துள்ளார். அதில் அவர் கூறியதாவது: ” நீங்களும் உங்கள் நண்பர்களும் எத்தனை பெண்களை பயன்படுத்திவிட்டு தூக்கி எறிந்து இருப்பீர்கள். உங்களைப் போன்றவர்களால் பல பெண்கள் பாதிக்கப்பட்டுள்ளனர்” என பரபரப்பு குற்றச்சாட்டை வைத்துள்ளார்.