நூதன முறையில் ஆணும், பெண்ணும் இணைந்து ஆடுகளை சொகுசு காரில் திருடி சென்ற சம்பவம் பரபரப்பை ஏற்படுத்தியுள்ளது.
சென்னை மாவட்டத்திலுள்ள கொரட்டூர் பகுதியில் இந்திரா என்பவர் வசித்து வருகிறார். இவர் தனது வீட்டில் ஆடுகளை வளர்த்து வந்துள்ளார். இந்நிலையில் வீட்டின் முன்பு கட்டி வைக்கப்பட்டிருந்த இந்திராவின் ஆடுகள் இடைவிடாமல் சத்தம் போட்டதால் அவர் வெளியே சென்று பார்த்துள்ளார். அப்போது கணவன் மனைவி போல் இருந்த ஒரு ஆணும், பெண்ணும் இணைந்து ஆடுகளை திருடி சொகுசு காரில் ஏற்றிச் சென்றதை பார்த்து இந்திரா அதிர்ச்சி அடைந்தார். இதுகுறித்து இந்திரா உடனடியாக கொரட்டூர் காவல் நிலையத்தில் புகார் அளித்துள்ளார்.
அந்த புகாரின் பேரில் வழக்குப்பதிவு செய்த காவல்துறையினர் அப்பகுதியில் பொருத்தப்பட்டுள்ள சிசிடிவி கேமராவில் பதிவான காட்சிகளை வைத்து தீவிர விசாரணை மேற்கொண்டு வருகின்றனர். மேலும் இதுகுறித்து காவல்துறை கூறும் போது, ஆடுகளை திருடி சென்றவர்கள் உண்மையிலேயே கணவன் மனைவியா அல்லது யாருக்கும் அவர்கள் மேல் சந்தேகம் வராமல் இருப்பதற்காக கணவன் மனைவி போல் நடித்து ஆடுகளை திருடி சென்றுள்ளனரா என்பது விசாரணைக்கு பின்பு தான் தெரிய வரும் என்று கூறியுள்ளனர்.