டி20 உலகக் கோப்பை போட்டியை ஐக்கிய அரபு அமீரகத்தில் நடத்த பிசிசிஐ பேச்சுவார்த்தை நடத்தி வருகிறது.
இந்த ஆண்டு டி20 உலகக்கோப்பை போட்டி இந்தியாவில் நடத்த திட்டமிட்டப்பட்டது. ஆனால் தற்போது இந்தியாவில் கொரோனா வைரஸ் பரவல் காரணமாக ,டி20 உலக கோப்பை போட்டியை நடத்த முடியாத நிலை ஏற்பட்டுள்ளது. இதனால் இதற்கு மாற்று இடமாக ஐக்கிய அரபு அமீரகத்தில் போட்டியை நடத்துவது குறித்து பிசிசிஐ பேச்சுவார்த்தை நடத்தி உள்ளது. இதனால் டி20 உலகக் கோப்பை போட்டி ஐக்கிய அரபு அமீரகத்தில் நடக்கலாம் என்ற எதிர்பார்ப்பு காணப்படுகிறது. இந்நிலையில் உலகக் கோப்பை போட்டிக்கு முன்பாக ,மீதமுள்ள ஐபிஎல் போட்டிகளை ஐக்கிய அரபு அமீரகத்தில் நடத்தி முடிக்க பிசிசிஐ முடிவு செய்துள்ளது.
இதனால் உலகக் கோப்பை மற்றும் ஐபிஎல் ஆகியவற்றிற்கு இடையே 4 நாட்கள் மட்டுமே இடைவெளி உள்ளது. உலகக்கோப்பை போட்டிக்காக 15 நாட்களுக்கு முன் ஐசிசி -யிடம் மைதானத்தை ஒப்படைக்க வேண்டும். ஆனால் ஐபிஎல் போட்டி துபாய் ,சார்ஜா மற்றும் அபுதாபி ஆகிய 3 மைதானங்களில் நடக்க இருப்பதால் , தொடர்ந்து விளையாடுவதால் ஆடுகளங்கள் தொய்வடைந்து விடும். இதனைக் கருத்தில் கொண்டு உலக கோப்பை போட்டியை , இலங்கையில் நடத்தலாமா ? என்ற சிந்தனையும் பிசிசிஐக்கு தோன்றி உள்ளது. இது குறித்து இலங்கை கிரிக்கெட் வாரியத்திடம் பிசிசிஐ பேச்சுவார்த்தை நடத்தி இருப்பதாக தகவல்கள் வெளியாகியுள்ளன. ஆனால் இந்த பேச்சுவார்த்தை ஆரம்பகட்டத்தில் தான் இருக்கிறது. இந்த டி20 உலக கோப்பையை போட்டியை இலங்கையில் நடத்துவதற்கு , இலங்கை கிரிக்கெட் வாரியம் விருப்பம் தெரிவித்துள்ளது.