அமெரிக்காவில் பிரபல அமேசான் இணையதள நிறுவனத்தின் சிஇஒ ஜெப் பெசோஸ், விண்வெளிக்கு பயணம் மேற்கொள்ளப்போவதாக தெரிவித்துள்ளார்.
அமெரிக்காவில் அமேசான் இணையதள வர்த்தக நிறுவனத்தை ஜெப் பெசோஸ் என்பவர் கடந்த 1994ஆம் வருடம் தோற்றுவித்தார். தற்போது வெற்றிகரமாக இயங்கிக் கொண்டிருக்கும் இந்நிறுவனத்தால், அவர் உலகின் முதல் பணக்காரராக உள்ளார். அவர் சிறுவனாக இருந்தபோது, விண்வெளி பயணம் மேற்கொள்ள வேண்டும் என்ற ஆசை இருந்துள்ளது.
எனவே கடந்த 2000 ஆம் வருடத்தில் விண்வெளி ஆராய்ச்சி நிறுவனத்தை ஆரம்பித்து, அதற்கு “புளூ ஆர்ஜின்” என்று பெயரிட்டுள்ளார். கடந்த 2015 ஆம் வருடத்தில், இந்நிறுவனத்தின் மூலம் “நியூ ஷெப்பர்ட்” என்னும் ராக்கெட் விண்வெளிக்கு வெற்றிகரமாக ஏவப்பட்டது. இதனிடையே கடந்த பிப்ரவரி மாதத்தில் வெளியான செய்தியில், ஜெப் பெசோஸ் வரும் ஜூலை மாத தொடக்கத்தில் அமேசான் சிஇஓ பதவியிலிருந்து விலகுவதாக கூறப்பட்டிருந்தது.
இந்நிலையில் ஜெப் பெசோஸ், தன் ட்விட்டர் மற்றும் இன்ஸ்டாகிராம் போன்ற இணையதள பக்கங்களில் “நான் ஐந்து வயது சிறுவனாக இருக்கும்போதே, விண்வெளி பயணம் எனக்கு கனவாக இருந்தது. ஜூலை 20ஆம் தேதி அன்று விண்வெளிக்கு என் சகோதரர் ஒருவருடன் பயணம் செய்யப்போகிறேன், இந்த மிகப்பெரிய சாகசத்தை என் நண்பருடன் மேற்கொள்ளப் போகிறேன்” என்று தெரிவித்திருக்கிறார்.