6 பேர் கொண்ட மர்ம கும்பல் வாலிபரை அரிவாளால் வெட்டிய சம்பவம் பரபரப்பை ஏற்படுத்தியுள்ளது.
புதுக்கோட்டை மாவட்டத்தில் உள்ள காரையூர் பகுதியில் பழனிச்சாமி என்பவர் குடும்பத்துடன் வசித்து வருகிறார். இவருக்கு 24 வயதான வினோத் என்ற மகன் உள்ளார். இந்நிலையில் வினோத் தனது இரு சக்கர வாகனத்தை எடுத்துக்கொண்டு வீட்டில் இருந்து புறப்பட்டுள்ளார். இதனையடுத்து வினோத் இருசக்கர வாகனத்தில் கொக்குப்பள்ளம் அருகில் சென்று கொண்டிருந்த போது 6 பேர் கொண்ட மர்ம கும்பல் திடீரென வினோத்தை சுற்றி வளைத்துள்ளனர். அதன் பிறகு அவர்கள் கண்ணிமைக்கும் நேரத்தில் அரிவாளால் வினோத்தை சரமாரியாக வெட்டி விட்டு அங்கிருந்து தப்பி ஓடிவிட்டனர்.
இதுகுறித்து தகவலறிந்த காவல்துறையினர் சம்பவ இடத்திற்கு விரைந்து சென்று ரத்த வெள்ளத்தில் உயிருக்கு போராடிக்கொண்டிருந்த வினோத்தை மீட்டு அரசு மருத்துவமனையில் சிகிச்சைக்காக அனுமதித்துள்ளனர். அங்கு அவருக்கு தீவிர சிகிச்சை அளிக்கப்பட்டு வருகிறது. இது குறித்து வழக்குப்பதிவு செய்த காவல்துறையினர் வினோத்தை அரிவாளால் வெட்டி விட்டு தப்பி ஓடிய மர்ம கும்பலை வலைவீசி தேடி வருகின்றனர்.