தண்டவாளத்தை கடக்க முயற்சி செய்தபோது முதியவர் ரயில் மோதி பலியான சம்பவம் சோகத்தை ஏற்படுத்தியுள்ளது.
தஞ்சை மாவட்டத்தில் உள்ள சித்தா நகர் பகுதியில் ஜான்சன் என்ற முதியவர் வசித்து வந்தார். இவர் சம்பவம் நடந்த அன்று தனது வீட்டிலிருந்து சைக்கிளில் வெளியே புறப்பட்டு சென்றுள்ளார். பின்னர் அவர் சிவாஜி நகர் பகுதியில் இருக்கும் ரயில்வே கீழ்பாலம் வழியாக செல்ல முயற்சித்துள்ளார். ஆனால் அங்கு மழை நீர் தேங்கி நின்றதால் அந்த வழியாக அவரால் செல்ல முடியவில்லை. இதனால் அவர் ரயில்வே தண்டவாளத்தை கடக்க முயற்சி செய்தபோது திருச்சி நோக்கி வேகமாக வந்த ரயில் அவர் மீது மோதியது.
இதில் அவர் தூக்கி வீசப்பட்டு சம்பவ இடத்திலேயே பரிதாபமாக உயிரிழந்துள்ளார். இதுகுறித்து தகவலறிந்த ரயில்வே காவல்துறையினர் சம்பவ இடத்திற்கு விரைந்து வந்து ஜாக்சனின் உடலை மீட்டு உடற்கூறு ஆய்வுக்காக தஞ்சை அரசு மருத்துவக்கல்லூரி மருத்துவமனைக்கு அனுப்பி வைத்துள்ளனர். மேலும் இது குறித்து ரயில்வே காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர். இந்நிலையில் ரயில்வே பாலத்தில் மழை பெய்து தண்ணீர் தேங்குகிறது.
இந்த தண்ணீர் உடனடியாக வடிந்து செல்ல வசதி இல்லாததால் அங்கேயே தேங்கி நின்று விடுகிறது. இதனால் கீழ்பாலத்தின் வழியாக மக்கள் செல்ல முடியாத நிலை ஏற்பட்டுள்ளதால் அவர்கள் தங்களது உயிரை பணயம் வைத்து ரயில்வே தண்டவாளத்தை கடக்கும் அவலநிலை ஏற்பட்டுள்ளது. எனவே ரயில்வே கீழ்தளத்தில் தேங்கும் தண்ணீர் உடனடியாக வடிவதற்கு வடிகால் வசதி ஏற்படுத்தி தர வேண்டும் என அப்பகுதி மக்கள் கோரிக்கை விடுத்துள்ளனர்.