கேட் மீது ஏறி நின்றதை தட்டி கேட்டதால் மர்ம நபர்கள் துணை நடிகை மற்றும் அவரது மகனை தாக்கிய சம்பவம் பரபரப்பை ஏற்படுத்தியுள்ளது.
சென்னை மாவட்டத்திலுள்ள வளசரவாக்கம் பகுதியில் துணை நடிகையான பாண்டி லட்சுமி என்பவர் வசித்து வருகிறார். இவர் துணை நடிகையாக பல்வேறு படங்கள் மற்றும் தொலைக்காட்சித் தொடர்களில் நடித்துள்ளார். இந்நிலையில் இவரது வீட்டிற்கு எதிர்ப்புறம் உள்ள ஒரு வீட்டின் கேட் மீது ஏறி நின்ற சில மர்ம நபர்கள் புறாவை பிடிப்பதற்கு முயற்சி செய்துள்ளனர். அப்போது லட்சுமியின் மகன் எதற்காக எதிர் வீட்டு கேட்டில் ஏறி நிற்கிறீர்கள் என்று அவர்களை தட்டிக் கேட்டுள்ளார்.
இதனால் கோபமடைந்த அந்த மர்ம நபர்கள் பாண்டி லட்சுமியையும், அவரது மகனையும் சரமாரியாக தாக்கியுள்ளனர். இதுகுறித்து வளசரவாக்கம் காவல் நிலையத்தில் துணை நடிகை பாண்டி லட்சுமி தன்னையும், தனது மகனையும் மர்ம நபர்கள் சரமாரியாக தாக்கியதுடன் கொலை மிரட்டல் விடுத்ததாக புகார் அளித்துள்ளார். அந்த புகாரின் பேரில் வழக்குப்பதிவு செய்த காவல்துறையினர் அப்பகுதியில் பொருத்தப்பட்டிருந்த சிசிடிவி கேமராவில் பதிவான காட்சிகளை வைத்து விசாரணை நடத்தி வருகின்றனர்.